اسماعیل خان: افغانستاننی اشغال دن قوتقرگن انسانلرنی عذرسوره ش گه احتیاجلری یوق

افغانستان سابق سوو برق وزیری اسماعیل خان بی بی سی بیلن بولگن صحبتیده افغانستاننی اشغال دن قوتقرگن انسانلر عذر سوره ش گه احتیاجلری یوق لیگینی تاکیدله گن،اما جنرال دوستم عذر سوره شی باره سیده قضاوت ایتمسلیگینی ایتگن.

افغانستان جهاد سيمالريدن و سابق سوو وبرق وزيري همده جمهور رييسليك نامزدي عبدالرب رسول سياف نينگ سيلاولرده گي بيرينچي معاوني محمد اسماعيل خان، افغانستانده اوتكزيليشي كوتيله ياتگن جمهور رييسليك سيلاولري مسله سي ني معمالي ديه تاكيدله گن.

او بي بي سي فارس خذمتي بيلن اوتكزگن صحبتيده، اوتگن اوچ دهه ايچيده بوليب اوتگن اوروشلرده توخته ليب، مذكور جنگلرده كوپچيليك آدملر قربان بولدي، اما بيرقطار شخصلر ايسه اوتيميشده گي جنگلردن فايده قولگه كيريتگني ني ايتگن. او شونينگ ديك، كيينگي ييللر بعضي بير رهبرلرنينگ سياست و تدبيرلري، مملكتده تورلي خيل توزوم و حكومتلرنينگ اورته گه كيليشيگه سبب بولگني ني اظهار ايتگن.

اسماعيل خان گه كوره، بعضي بير مملكت ده سياست ايجابي و سلي نتيجه لرگه ايلنه دي، اما افغانستانده بير قطار شخصيتلر مملكت ني ايجابي تمان يعني بحراندن قوتقه زيشگه خذمت قيليشگن. اونينگ فكريچه، افغانستان سياسي صحنه سيده دخيلدار بعضي شخصيتلر اوزلري نينگ نامعقول حركتلري باعث، سياسي موقعي ني قولدن بيريب، باشقه لرنينگ مخالفتيگه روپه ره بوليشگن.

اسماعيل خانگه جنرال دوستم نينگ اهالي دن سونگي عذرسوره شيگه قنده ي فكربيلديره سيز ديگن سوالگه:"اوروشلر قربانلري فرقلي، بيرقطار شخصلر وطن ايركينگلي اوچون و بيرتعداد ايسه، باشقه لر نينگ عصيان كوته ريشيني باستيريش اوچون اولرگه قرشي اوروش آليب بارگن. بو عذر سوره شلر تفاوت قيله دي. قربان لرده اوزيني عيبدار بيله ديگن شخص نينگ عذر سوره شي كيره ك بوله دي. جهاد اوچون و اهالي ني قوتقه زيش اوچون جنگ و كوره ش دن عذر سوره شگه احتياج يوق"دييدي.

او، اوروشلردن تورلي خيل فكرلركيليب چيقيشي ممكن، بعضيلر بو توغريده سلبي و باشقه لر ايسه ايجابي فكر بيلديريشي ممكن، بو مسله قضاوت اوچون افغانستانگه خلقيگه تاپشيريليشي كيره كليگي ني تاكيدله گن.

اسماعيل خان گه كوره، خلق يورتلري كيملر تمانيدن اشغال ايتيلگني و كيملر تمانيدن آزاد قيلينگني ني بيليشي كيره ك.اونينگ ايتيشيچه، مملكتده هنوز هم تينچ سيزليك قد كوته ريب باره ياتگني گه قره مه ي، اهالي وطن نينگ آزادليككه ايريشگني دن فخرلنيشي كيره ك.

اما افغانستان مستقل انسان حقلرینی سقلش کمیسیون نینگ اجرای رییسی موسی محمودی جنرال دوستم نینگ عذر سوره شینی القیش لب، لیکن اسماعیل خان نی اوتمیشده گی حادثه لرگه نسبتا اظهاراتینی کبرو غرور بهالب قربان بولگن لرگه یاردم بیرمسلیگینی تاکیدله گن.

بوندن آلدین هم انسان حقلرینی سقلش کمیسیونی و مدنی جمعیت قوریلمه لر ژنرال دوستم نینگ عذرسوره شینی آلقیش له گن ایدی.

باشقه تماندن اسماعيل خان، مملكتده عدالت يعني اوتيش دور توزومي اورنه تيلدي، بو خلق تمانيدن ايمس بلكه زوردن قبول قيلينيب، افغانستان نينگ مصفا سيمالري و خذمت كورستگن شخصيتلريني عيبدار ايتيش مقصديده حركت باشلنگن ايدي، اما بختگه موافق افغانستان پارلماني بو لايحه ني خارجي لرتمانيدن ايشلب چيقيلگن فتنه ديه رد ايتيشدي دييدي او.

او كابل ني ويرانه ايلنتيرگن حاكميت اوچون عملگه آشيريلگن گروهي اوروشلرني، حق و باطل اوروشي ديه توصيفله گن. اونگه كوره، كابلده گي جنگلر وقربانلرنينگ باش عامللري ايچكريده ايمس، بلكه حاضر هم خارج دن توريب، اهاليني اولديرماقده و افغانستانده جنگ دوام ايتيشي اوچون بيل باغله گن.