امريكا و افغانستان خوفسيزليك كيليشوونامه نينگ مهم مسله لري اوستيده كيليشگنلر

افغانستان جمهور رييسي حامدكرزي و امريكا تشقي ايشلر وزيري جان كري، امريكا وافغانستان اورته سيده گي خوفسيزليك كيليشوونامه نينگ مهم موضوعلريدن بير قسمي اوستيده كيليشيب آلگنليكلريني اعلان قيليشگن.

بو مذاكره ده افغانستانده جنجل گه ايلنگن امريكا ليك كوچلري نينگ قضايي مصونيتي باره سيده لويه جرگه اوتكزيليشي گه قرار قبول قيلينگني ايتيله دي.

حامدكرزي و جان كري نينگ قوشمه مطبوعات انجمني كوتيلگن 12 ساعت دن سونگ، كابلده باشلندي و مطبوعات باشيده حامدكرزي جدي مذاكره لردن سونگ، تورت موضوع اوستيده كيليشيلگنيني تاكيدله گن.

كرزي جنابلريگه كوره، ملي حاكميت، خارجي تجاوز، تينچ اهالي تلفاتي و اوز باشيمچه عملياتلر باره سيده كيليشيلگن.

كرزي جنابلري گيله لي سوزبيلن، امريكا وافغانستان ارا استراتيژيك پيمان امضالنگني دن بير يريم ييل اوتگن سونگ، امريكا افغانستان ني خارجي تجاوز برابريده مدافعه قيلمه دي شو سبب دن خارجي اره لشووباره سيده بير انيق تعريف گه كيليشيب آليشيميز كيره ك ايدي ديگن.

او:" بيز خارجي تجاوز فقطگينه افغانستانگه خارجي لرنينگ توپ وتانگ بيلن كيريب كيليشي حسابگه آلينه دي مي يا ترورچيلر ني يوباريش و اولرني حمايه لش؟" دييدي.

افغانستان جمهور رييسي افغانستانده امريكاليك كوچلرگه قضايي مسونيت بیریش باره سيده گي قرار دولت نينگ صلاحيتي دن يوقاري بوليب، اوني فقطگينه اهالي حل قيليشي ممكنليگي ني ايتگن.

اونگه شو مسله باعث، بير آي ايچيده مصلحتي لويه جرگه اوتكزيليشيگه قرار قبول قيلينگن.

عين حالده، جان كيري اگر افغانلر امريكا كوچلريگه قضايي مصوونيت بيرمه گن تقديرده، امريكا بو كيليشوونامه ني امضاله مسليگي ممكنليگي ني تاكيدله گن.

امريكا تشقي ايشلروزيري:"افغانستانده كيسكين مصونيت دن هيچ كيم گپيرمه گن. امريكا حربي لري افغانستان قانونيني آياق آستي قيلگن تقديرده، اوزيميز اولرني محكمه قيله ميز، حربيلريميز قه يرده بولمه سين شو روشده محكمه ايتيله دي بيز اساسي قانونيميز ني افغانستانده نظرده چيقه ره آلمه يميز".

كيري جنابلري گه كوره، ايكله مملكت بيرقطار مسله لر اوستيده كيلييب آليشدي، امريكا افغانستان گه اوزاق مدتلي همكارليك كورستيشگه طرفدار. او شونينگديك، 2014 ييلدن سونگ، افغانستان خوفسيزليك كوچلريني مالي وجهازلش نقطه ي نظريدن حمايه قيليشيني تاكيدله گن.

امريكا تشقي ايشلروزيري:"امريكا كوچلريگه قضايي مصونيت سوزيدن فايده لنيش توغري توشمه يدي. زيرا كه بيز عسلريميز قانون ني اياق آستي قيله ديگن بولسه، اولرني اوز قانونيميز اساسيده جزاله يميز".

افغانستانده گي خارجي كوچلرگه قضايي مصونيت بيريش، امريكا وافغانستان ارا خوفسيزليك كيليشوونامه اوستيده گي مذاكره لرجريانيده گي كته جنجللر دن ايكني ايتيله دي.

افغانستان دولتي مملكت ده گي امريكا ليك كوچلري خلافكارليككه قول اورگن حالده، مملكت ده محكمه ايتيليشي ني تاكيدله گن.

اما امريكا بار بار افغانستانده خلافكارليككه قول اوره ديگن عسكرلریني، امريكا قانوني اساسيده محكمه ايتيشي ني ايتيب كيلگن.

جان كري اوتگن كونگي مطبوعات انجمنيده، امريكا حربي لري كوپچليك مملكتلرده جايلشگن بوليب، او مملكتلر شو كيليشوونامه اساسيده عمل قيليشه دي ديگن.