"قوراللي مخالفلر ايكي باله ني دولت گه همكارليكده عيبلب اولديريشگن"

افغانستان ايچكي ايشلروزيرليگي، دولت گه قرشي قوراللي مخالفلر مملكت شرقيده گي كنر ولايتي نينگ وته پور تومنيده ايكي باله ني اولديريب كيتيشگني ني اعلان قيلگن. خبرنامه ده مذكور ايكله باله 8 و 10 يشر دييلگن.

اوشبو وزيرليك تمانيدن نشر ايتيلگن بيرخبرنامه ده كيلتيريليشيچه، دولت گه قرشي قوراللي مخالفلر مذكور باله لرني دولت گه همكارليك قيلينگنليكده عيبلب اوغيرلشگني دن سونگ، اولديريشگن.

خبرنامه ده مذكور ايكله باله 8 و 10 يشر دييلگن.

ايچكي ايشلر وزيرليگي رسميلري، اولديريلگن باله لرنينگ دولت گه هيچ قنده ي علاقه سي بولمه گن. اولر بير نيچه كون آلدين قويلريني قربان هييتي مناسبتي بيلن ساتيش اوچون بازارگه كيته ياتگن بير چاغده قوراللي مخالفلر تمانيدن اوغيرلنگن.

كنر پوليسي نينگ ايتيشيچه، اولر باله لر جسديني اوته پور تومني نينگ اوزاق مسافه لي منطقه سيدن تاپيب آليشگن.

ايچكي ايشلروزيرليگي بو حادثه ني قاره لب، بو طالبان تمانيدن عملگه آشيريلگني ني ادعا قيلگن.

اما طالبان عاموي اخبارات واسطه لريگه مكتوب يوللب، اوني رد ايتيشگن.

افغانستان نينگ كنر ولايتي پاكستان بيلن چيگره داش. بو ولايت مملكت نينگ شرقيده گي ناتينچ منطقه سيدن سنه له دي.