كاينات گوزه لي "تاج محل ني اياق ـ آستي قيلدي"مي؟

Image copyright Maya Vision

هندوستان پوليسي امريكاليك 21 يشر "كاينات گوزه لي" آليويه كلپاني خوددي شو نرسه ده عيبله ماقده.

بويوك بابري حكمدارلريدن بيري بولگن شاه جهان سيويملي رفيقه سيگه اتب قورديرگن "تاج محل" جهان معمارچيليگي نينگ "دردانه سي" سنه له دي.

"محبت آبده سي"، ديب هم يوريتيلووچي مقبره بيرلشگن ملتلر يونسكو جمغرمه سي نينگ "ناياب معماري آبده لر" رويخطيگه كيريتيلگن.

عصرلركه اوزي نينگ گوزه ليگي و نفاستي بيلن انسانلرنينگ عقليني شاشيريب كيله ياتگن" تاج محل" " دنيا نينگ ييتي معجزه سيدن بيري" صفتيده هم اعتراف ايتيلگن.

هندوستان دن آلينگن خبرلرگه كوره، "كاينات گوزه لي" اولدن رخصت آلمه ي توريب، مقبره سطحيده خارجي شركتلردن بيري نينگ پاي افزاليني ريكلمه قيلگن.

هندوستانده گي كوزه كورينگن نشريه لردن بيري بولگن "هندوستان تايمز" نينگ يازيشيچه، حادثه اوتگن يكشنبه كوني يوز بيرگن و محلي پوليس نينگ "گوزه ل" گه قرشي ايش آچيشي بيلن يكونلنگن.

كوني كيچه "كاينات گوزه لي" تنلاوي تشكيلاتچيلري هندوستان دن رسمآ "عذر" هم سوره ب چيقيشگن.

"گوزه ل" نينگ اوزي ايسه، هله قچان هندوستان ني ترك ايتگني ايتيلماقده.

آليويه هندوستانده نيمه لر قيليب يورگندي؟

Image copyright AP

تشكيلاتچيلرگه كوره، آليويه خانم هندوستان گه "كاينات گوزه لي" صفتيده سفر قيله ياتگن بولگن.

خبرلرگه كوره، امريكا نينگ راد ـ هيلند آرالي ليك آليويه كلپا"كاينات گوزه لي" صفتده گي مجبوريتلري دايره سيده 10 كونگه هندوستانگه سفر قيله ياتگن بولگن.

اوتگن يكشنبه كوني ايسه، گوزه ل نينگ "تاج محل" مقبره سي گه قيلگن سفري فوتو ـ سيسيه گه ايلنيب كيتگن.

خبرلرگه كوره، آليويه خانم مقبره نينگ آق مرمرلي زينه سيگه اوتيريب، بير جفتي اياغيده، ايكينچي سي قوليده بولگن الفاظ ده اياق كييملريني ريكلمه قيلگن.

"تاج محل" سطحيده بيرار بير نرسه ني ترغيب يا كه تشويق قيليش رسمآ تحقيقلنه دي.

شوباعث هم، مقبره نظارتچيلري "كاينات گوزه لي" و اونينگ همراه لري اوستيدن پوليس گه شكايت قيليشگن.

آليويه كلپا اوتگن ييل دسمبرآييده بوليب اوتگن تنلاوده 88 رقيبيني آرتده قالديريب، "كاينات گوزه لي" تاجيني قولگه كيريتگندي.

كاينات نينگ بو ييلگي گوزه لي ايسه، روسيه پايتختي مسكو ده اينقلندي.

عيبدار، ديب تاپيلسه، " كاينات گوزه لي" جرميگه تارتيليشي ممكن.

Image copyright ap

"كاينات گوزه لي" تشكيلاتچيلري اوز عذرخواهليكلري بيتيلگن بياناتلريني اوتگن كون "فرانس پريس" اخبارات آژانسيگه يوللشگن.

آژانس اوز خبريده، بيانات نينگ" بيز" كاينات گوزه لي" اشتراكيده يوز بيرگن حادثه اوچون هند خلقيدن اوتينيب كيچريم سوره يميز"، ـ ديگن سطرلريدن اقتباس كيلتيرگن.

بيانات مضمونيدن عيان بوليشيچه، آليويه كلپا خانم مخلصلري اوچون ويديو كونده ليك لر قيله ياتگن بولگن.

"بيز شو ريجه ميزنينگ بير قسمي اوله راق فوتو ويديولريميزگه حامي لريميزني هم جلب قيله ميز. بو ايشلريميز تجاري مقصدلرني كوزگه توتمه يدي"، ـ دييله دي اولرنينگ بياناتيده.

"بيز احتياط سيزليگيميز سبب بولمسدن ييتكزگن آزاريميز اوچون چين دلدن كيچيريم سوره يميز".

خبرلرگه كوره، "كاينات گوزه لي" بيلن بيرگه " تاج محل" گه بارگن هندو ديزاينلريدن بيري گه هم ايش آچيلگن.

اگر، عيبدار، ديب تاپيليشسه، ايكاولان جريمه گه تارتيليشلري ممكنليگي ايتيلماقده.

Image copyright Aga Khan Trust for Culture

بابريلر دوريده يره تيلگن و حاضر هم اوز گوزه لليگي صلابتيني بوتون دنيا گه كوز ـ كوز قيله ياتگن معماري آبده لر آ‍ز مونچه ايمس.

مقبره ني تاريخيگه بويوك مغول امپراتوري صفتيده هم كيرگن شاه جهان اوزي نينگ سيويملي رفيقه سي ممتاز محل بيگيم خاطره سيگه ايتيب قورديرگن.

شونده ي گينه جمنا درياسي بوييده جايلشگن "تاج محل" ني ييليگه دنيا نينگ تورلي بورچكلريدن كيلگن ميليونلب آدملر زيارت قيليشه دي.

اوني بعضآ "ياناقدن آقه ياتگن كوز ياشي "گه هم قياسلشه دي.

مقبره گه آياق كييميده كيريش و يوريش تحقيقلنگن.

اما آليويه خانم قوتو صورتلريني اوتكزگن باغيده آياق كييمي ده يوريش ممكن.

آق مرمرلي قيمت بها تاشلر اوييب ايشلنگن، "تاج محل" مقبره ني كوريش ايشلري بيگيم نينگ اوليميدن ييل اوتيب، 1632 ييلده باشلنه دي.

تاريخي مبنعلرده" گوزه لليك و زنده تنها" بولگني ايتيلگن مملكت نينگ 14 ـ فرزندي ني توغيش پيتيده دنيا دن كوز يومگني ايتيله دي.

اوزيدن كيين هم دنيا نينگ منه من، ديگن قنچه دن قنچه معمارلريني الهاملنتيريب كيله ياتگن مقبره 22 ييل ديگنده قوريب بيتكزيلگن.

اوزبيكستان نينگ انديجاني دن بولگن و اوز يورتي قاليب، هندوستانده بابريلر سلاله سيگه اساس سالگن ظهيرالدين محمد بابر نينگ مقبره سي ايسه، افغانستان نينگ كابل شهريده جايلشگن.

ايريم منبع لرده كيلتيريليشيچه، شاه جهان تصوريده گي "سيويكلي سي نينگ جنتده گي اويي ني يره تيش اوچون ييگيرمه مينگته اوسته كيچه و كوندوز تير توكيب ايشله شه دي.

خلق آغزيده يورگن روايتلرده ايسه، قيتيب باشقه " تاج محل " قورمسليكلري اوچون شاه برچه اوسته لرنينگ قوللريني كيسيب تشله گن ايكن، ديب مبالغه هم قيلينه دي.

اوتگن ييل بيرلشگن عرب اميرليگي دوبي ده "تاج محل" مقبره سي نسخه سيني يره تيش لايحه سي بيلن چيققندي.

اوشبو لايحه نينگ قيمتي ايسه، 1 ميليارد دالر گه بهالنگندي.

بابريلرنينگ هند يريم آراليده گي حكمدارليگي اوچ عصردن زياد دوام ايتگن.

اولرنينگ شاه ليكلري دوريده يره تيلگن و حاضر هم اوز گوزه لليگي و سلابتيني بوتون دنياگه كوز كوز قيله ياتگن معماري آبده لر بيرگينه "تاج محل" بيلن چيكلنمه يدي.

پايتخت دهلي ده گي قيزيل قلعه و جامع مسجدي، پتي پور سيكريده گي پنچ محل، لاهورده گي جهانگير مقبره سي و شليمرباغي هر كوني نيچه يوز مينگ سياحلرني اوزيگه جلب ايته دي.