افغانستان سيلاولر نامزدلري نينگ رويخطي اعلاني كيچيكتيريلدي

افغانستان جمهور ر ييسليك سيلاولرنامزدلري نينگ باشلنغيچ رويخطي اوتگن كون اعلان ايتيليشي ممكن ايدي.

افغانستان سيلاولر مستقل كميسيوني جمهور رييسليك نامزدلري نينگ باشلنغيچ رويخطي اعلاني ني سه شنبه گچه كيچيكتيرگن.

افغانستان سيلاولر مستقل كميسيوني سوزچيسي نورمحمد نور نين بي بي سي گه ايتيشيچه، افغانستان تشقي ايشلروزيرليگي گه ايككي مملكت وطنداشليگگه ايگه بولگن نامزدلر تيكشيريليشي اوچون يوباريلگن مكتوب نينگ جوابي اوز وقتي ده ييتيب كيلمه گني، بونينگ كيچيكتيريليشيگه سبب بولگن.

نور جنابلري گه كوره، سيلاولر مستقل كميسيوني تشقي ايشلروزيرليگي دن جمهور رييسليككه نامزد 26 كيشي و 52 معاون نينگ حجتلريني تيكشيريب اولرنينگ افغانستان فقراسي بولگنليگي حقيده كميسيون گه معلومات بيريشيني سوره گن.

او، افغانستان تشقي ايشلروزيرليگي شنبه كوني كيچقرون كميسيونگه مكتوب نينگ جوابيني يازيب يوبارگن دييدي.

افغانستان سيلاولر مستقل كميسيوني سوزچيسي نينگ ايتيشيچه، اوشبو كميسيون تشقي ايشلروزيرليگي يوبارگن جواب ني تيكشيريب چيققندن سونگ، جمهور رييسليك وولايت كينگش سيلاو نامزدلري نينگ باشلنغيچ رويخطيني سه شنبه كوني اعلان ايتيشي ممكن.

عين حالده، افغانستان ايركين و عدالتلي بنياد يا فيفا جمهور رييسليك سيلاولري نامزدلري نينگ رويخطي اعلاني كيچيكتيريلگني باره سيده تشويش بيلديرگن.

نظارت ايتووچي بو بنياد مسووللري گه كوره، سيلاولر مستقل كميسيوني نظارت ايتووچي مستقل اداره لرگه جمهور رييسليك سيلاولري نامزدلري نينگ حجتلري تيكشيريليشي جرياني ني نظارت ايتيشگه رخصت بيرگن.

افغانستان اساسي قانونيده جمهور رييسليك نامزدلري و معاونلري افغانستان فقراسي بوليشي ني تاكيدله يدي.

ايككي مملكت وطنداشي موضوعي افغانستان ده كيينگي ييللر كته بحثلرگه سبب بولگن. افغان سياستچيلريدن بيرقطاري اوتميشده خارج مملكتلريده كون كيچيريب وطنگه قيتيشگن و بيرتعدادي ايسه، ايككي مملكت وطنداشي بوليشگن.