غزني ده يول چيكکه سيگه اورنه تيلگن ماين پارتلشيده 15 عيال وباله قربان بولدي

افغانستان رسميلري، توي مراسميگه كيته ياتكن كميده 18 نفر تينچ اهالي، غزني ولايتيده يول چيككه سيگه اورنه تيلگن ماين پارتلشي نتيجه سيده حياتي ني يوقاتگني ني ايتيشگن.

اولرنينگ ايتيشيچه، هلاك بولگنلرنينگ برچه سي عياللر وباله لر دن عبارت بوليب، اولرنينگ مينگن موترلري بوتونلي اورته دن كيتگن.

طالبان بو حادثه ده قوللري بولمه گني ني ايتيشگن.

خارجي و افغان خوفسيزليك كوچلريني نشانگه آليش مقصديده يول چيككه سيگه اورنه تيله ياتگن ماينلر، افغانستان بيرقطار تينچ اهالي سي نينگ قربان بوليشيگه سبب بولگن.

بو حادثه غزني نينگ ناتينچ اندر تومني ده يوز بيرگن.

حادثه محلي دن غزني شفاخانه سيگه 18 جسد آليب كيلينگن، اما غزني واليسي سوزچيسي هلاك بولگنلر بوندن هم كوپ ايكني ني ايتگن.

غزني پوليس قومانداني معاوني اسدالله انصاف، مذكور حادثه ده 14 عيال، اوچ ايركك و بيرباله هلاك ايتيلگني ني معلوم قيلگن.

موترده گي 23 نفردن بيش ته سي امان قالگن، اما اولردن ايكيته سي نينگ احوالي آغير دييلگن.

بي بي سي نينگ كابلده گي دركچيسي ديويد لاين، غزني نينگ كوپلب قيشلاق منطقه لري طالبان تصرفيده بوليب، حادثه يوز بيرگن اندر تومني ناتو تمانيدن نا برقرار منطقه ديب توصيفلنگني ني ايتگن