حامدكرزي اوچ تمانلمه مذاكره لرده قتنه شيش مقصديده بريتانيا گه ييتيب باردي

كرزي جنابلري بيريتانيا گه قيلگن سفري جريانيده اسلام دنيا سي نينگ اقتصادي كنفرانسيده هم اشتراك ايته دي.

افغانستان جمهور رييسي حامدكرزي، پاكستان، افغانستان و بيريتانيا ارا اوچ تمانلمه مذاكره لرنينگ تورتينچي دوريده اشتراك ايتيش اوچون، لندنگه ييتب باردي.

بو اوچ تمانلمه ييغينده، پاكستان باش وزيري نوازشريف و بيريتانيا باش وزيري ديويد كامرون هم قتنه شيشي ممكن.

بو ييغين نينگ بيرينچي دوري ايرته گه باشلنه دي.

بو اوچ تمانلمه ييغينده، صلح تامينلنيشي مسله سي اينگ اساسي موضوع صفتيده محاكمه ايتيليشي ممكن.

كرزي جنابلري پاكستان دولتي دن اوزي نينگ طالبان ده گي نفوذي دن فايده لنيب، افغانستان دولتي و طالبان اورته سيده صلح مذاكره لر عملگه آشيريليشي اوچون زمينه يره تيشي ني سوره گن.

اوتميشده گي مذاكره لرده، افغانستان نينگ پاكستان دن قيلگن طلبلريدن بيري ملا برادر ني آزاد ايتيش بولگن.

طالبان نينگ ايكينچي لوازملي نفري ملابرادر، بيرنيچه ييلدن بيري پاكستانده قماق ده كون كيچيرماقده.

پاكستان دولتي ملابرادر ني قوييب يوبارگني ني ايتگن، اما طالبان گروهي او حاضر هم قماقده ايكني ني تاكيدله ماقده.

افغانستان دولتي هر دايم تيرورچيلرنينگ مركزي پاكستانده ايكني ني تاكيدلب كيلگن.

پاكستان اردوسي استخبارات تشكيلاتي آي ايس آي، هر دايم طالبان ني حمايه ايتگنليكده و اولرني پاكستانده باش بيرگنليكده عيبلنيب كيلگن.

پاکستان ايسه، بار بار بو عيبلاولرني رد ايتگن.