پكتيا ولايتيده بير مسجد ده ماين پارتلشي عاقبتيده اوچ پوليس مآموري هلاك بولگن

Image caption پكتيا ولايتي افغانستان نينگ ناتينچ جنوبشرق ولايتلريدن بوليب، پاكستان بيلن چيگره داش.

افغانستان ايچكي وزيرليگي نينگ ايتيشيچه، پكتيا ولايتيده گي مسجدلردن بيريده ماين پارتلشي عاقبتيده اوچ پوليس نمازادا قيله ياتگن بير پيتيده هلاك بوليشگن.

اوشبو وزيرليك نينگ خبري سايتيده يازيشيچه، بوپارتلش اوتگن كيچه ساعت سكيزدن كيين پكتيا ولايتي خيركوت تومنيده يوز بيرگن.

بو منبع گه كوره، طالبان گروهيگه منسوب شخصلر بومسجد گه ماين اون تيشگن. پارتلشده باشقه بير پوليس ماآموري هم يره لنگن.

حاضرگچه طالبان گروهي بوخبر يبرار نرسه ديمه گن.

عين حالده، افغانستان ايچكي ايشلر وزيرليگي، لوگر ولايتي مركزي پل علم ده گي جامع مسجد طالبان تمانيدن هييت نمازي چاغيده پارتله تيلگني باعث، اهالي هنوز گچه مسجد گه بارمه ي قاليشگني ني ايتگن.

قربان هييتي نينگ بيرينچي كونيده پل علم شهري نينگ مسجديده يوزبيرگن پارتلشده آلدينگي لوگر ولايتي نينگ حاكمي ارسلا جمال هلاك بوليب، همده 15 كيشي يره لندي.

ايچكي وزيرليگي نينگ ايتيشيچه، پكتيا ولايتي سه گانه تومنيده جايلشگن مسجد ده يوزبيرگن ماين پارتلشي بيلن، طالبان اوز هدف لريگه ايريشيش مقصديده، حتي خلق نينگ مقدس مكانلريگه "اهانت" قيليشده قول اوريشه دي.

ايچكي وزيرليگي طالبان نينگ " مقدسات گه اهانت" قيليشده عيبله گن.

بوندن آلدين افغانستان عالم لركينگشي مقدس مكانلرگه هجوم قيليشني كيسكين قاره له گندي.

باشقه تماندن، افغانستان مدافعه وزيرليگي، كوني كيچه پكتيا ولايتيده گي پوسته لردن بيريده ايككي پارتلش يوزبيرگني عاقبتيده، تورت عسكرهلاك بوليب همده اوچته سي يره لنگنيني دن خبر بيرگن.

مدافعه وزيرليگيگه كوره، پارتلش بيرگروه هجومچيلر تمانيدن صادر ايتيلگن. هجومچيلر بو پوسته نينگ اوچ تماندن نشانگه آليشگن.

مدافعه وزيرليگي نينگ فيسبوك صحيفه سيده يازيليشيچه، پارتلش عاقبتيده هجومچيلرهمده پوسته عسكرلري اورته سيده يوز بيرگن توقنه شووده، هجومچيلردن هم هلاك بولگن ليگي ايتيله دي. ليكن هلاك بولگنلر تعدادي انيق لنمه گن.