افغانستان شاه يوللر پوليس پوسته لريدن آلتميش فايزي ساليق آليشه دي

شفافيت ني كوزه تووچي بير نادولت تشكيلات اوزي نينگ بير گزارشيده افغانستان قتناو يوللري ده گي پوليسلردن آلتميش فايزي هيداوچيلر بيلن ناتوغري يانده شيله ياتگني ني قيد ايتگن.

بو تشكيلات مسووللريدن بيري اكرم فضلي نينگ مطبوعاتگه ايتيشيچه، قتناو يوللر پوليسي قانوني مصونيتگه ايگه بوليب، هيداوچيلردن ناقانوني روشده ساليق آليشه دي.

اونگه كوره:" افغانستان شفافيت ني كوزه تووچي اداره سي هر بير اون پوسته دن آلتي ته سي ناقانوني روشده ساليق آليشيني كوزه تگن. اورته چه آلينه دينگن پول مقداري 300 افغاني دير".

افضلي جنابلري، يوك تشووچي موترلر هيداوچيلريدن ناقانوني پول آليش، عادي بير مسله گه ايلنگن.

افغانستان شفافيت ني كوزه تووچي اداره سي مسووللريگه كوره، گزارش تيارلاوچيلر پوليس مآمورلري بيلن 370 دن زياد مراتبه شاه يوللرده صحبت اوتكزيب، شاه يوللرده گي پوسته لر خوفسيزليك ني تامينلنيش اوچون بولمه گني ني يازيشگن.

گزارش يازووچيلريدن محمد اسحاقزاده نينگ ايتيشيچه، هيداوچيلردن 41 فايزي شاه يوللرده گي پوليس لر عملگه آشيريله ياتگن اوغيرچيليك ني كمه يتيريشده هيچ قنده ي تاثير قويمه گني ني ايتيشگن. بوهيداوچيلر، اولر شاه يوللريده جدي اوغيرچيليككه دوچ كيليشيلريني معلوم قيليشگن.

اما افغانستان ايچكي ايشلروزيرليگي، شفافيت اداره سي نينگ گزارشي حاضرگي كونده تصديقلنمسليگي ني ايتيب، شاه يوللرده گي پوليس صفيده ساليق آليش ميزاني كمه ي گني باره سيده تاكيدله گن.

ايچكي ايشلروزيرليگي سوزچيسي صديق صديقي نينگ بي بي سيگه ايتيشيچه، بو وزيرليك گزارشده گي موضوعلرني مطالعه ايتيب، قوليميزده گي حساباتده شاه يوللرده گي وضعيت انچه اوزگرگن.

اونگه كوره، مملكت نينگ اكثر منطقه لريده ناقانوني ساليق آليش تشويشي موجود ايدي، اما بونگه قرشي كوره شيش دوام ايتديريلماقده.

افغانستان شفافيت ني كوزه تووچي اداره سي،فقطگينه پوليس آره سيده ساليق آليش و ناتوغري يانده شوو پيدا بولمه گن، بلكه ترانسپورت، فوايد عامه، مخدرماده لرگه قرشي كوره ش و شهردارليك مامورلري هم ساليق آليشگه قول اوره ياتگني ني ايتگن.

بوندن تشقري جنوبي منطقه لرده جنگريلرنينگ هجومي، قوراللي اوغيرچيليك هم هيداوچيلر و يولاوچيلر اوچون جدي تهديد حسابلنه دي.