افغانستان مهاجرلر وزيري استيضاح قيلينب، اوزجاييده قالدي

اولوسي جرگه مهاجرلر وزيريني استيضاح قيلدي، اما صلاحيتسيزقيلينمه دي.

افغانستان ملي كينگشي اعضالري مهاجرلر وزيري جماهير انوري ني كفايتسيزليك، فساد و افغان مهاجرلري تقديريگه اعتبار قره تمه گنليكده عيبلب، مجلسگه چقيردي. اما صلاحيتي رد ايتيلمه دي.

هرات ولايتي اهالي سي نينگ اولوسي جرگه ده گي نماينده سي خانم فريد ناهيد، مهاجرلروزيريني مهاجرلر اوچون بيريله ديگن هر بير ييرنمره لريدن 3500 دالر توله ياتگنليكده عيبله گن.

"انوري خارجي سفري خره جتي ني ايكي مراتبه افغانستان دولتي و مهاجرلر بوييچه عالي كميساري دن قولگه كيريتگن" دييدي ناهيد.

اونگه كوره، جماهير انوري مهاجرلر وزيرليگيده اوز يقينلري و دوستلريني وظيفه دار ايتگن.

غزني ولايتي اهاليسي نينگ اولوسي جرگه ده گي نماينده سي نفيسه عظيمي، دولت تمانيدن تامينلنه ياتگن وزيرليك اداره سي گه تيگيشلي برق پوليني مهاجرلر خلق ارا اداره سي دن تولتگنيني اداعا قيليب، بو مبلغ وزيرنينگ اوغلي نينگ افغانستان خصوصي بانكلردن بيريده گي حسابيگه كيريتيلگني ني معلوم قيلگن.

كابل اهاليسي نماينده سي شكريه بازكري، هم افغانستان مهاجرلر وزيرليگي لايحه سيني تنقيد ايتيب، بو وزيرليگ و خارجي مملكتلر ارا امضالنگن كيليشوو نامه لر، بيرقطار افغان مهاجرلري نينگ كته خرجت بيلن اوروپا مملكتلريگه ييتيب باريشيگه سبب بولگني ني ادعا قيلگن.

سوزلري افغانستان ملي كينگش رييسي نينگ اعتراضيگه ايلنگن رمضان بشر دوست هم، مهاجرلر بوييچه ايشله ياتگن دولت اداره لري مهاجرلر مسله سي ايزلديزدن بوتونلي حل ايتيليشي اوچون سعي و حركت قيلينيشي ني تاكيدله گن.

جماهير انوري هم اوزيني مدافعه قيليب، زيچ استقامت قيله ديگن ايران و پاكستانده گي مهاجرلر معمالريني بير آز حل ايتگنليگي ني ايتگن.

افغانستان بيرقطار مدني فعاللري هم ملي كينگش ايشيگي قرشي سيده توپله نيب، اوروپا وآسترالياده گي مهاجرلرنينگ هيده ب چيقه ريلمسليگي ني سوره گن.