كنرده گي محلي پوليس نينگ كروميت قه زيب چيقه ريليشي و قاچاقيده قولی بارلیگی ایتیلماقده

افغانستان نينگ شفافيت ني كوزه تووچي اداره سي يقينده نشر ايتگن اوزي نينگ بير گزارشيده، كنر ولايتيده پوليس كروميت نينگ ناقانوني قه زيب چيقه ريليشي و قاچاقيده قولي بارليگي ني فاش ايتگن.

بو گزارشگه كوره، كنر نينگ خاص تومنيده كروميت نينگ ناقانوني قه زيب چيقه ريليشي وقاچاق ايتيليشي دن قولگه كيله ياتگن درآمد قوراللي گروه لرنينگ چونته گيگه توشيب، مذكور تومنده خوفسيزليك يامانلنيشيگه سبب بولگن.

كنرحاكمي شجاع ملك جلاله نينگ بي بي سيگه ايتيشيچه، بو كان تاشي بوندن آلدين قاطر و آته آرقه لي پاكستان گه قاچاق قيلينردي، اما محل اهاليسي بيلن كيليشيلگن قرارگه بنآ؛ حاضر كروميت قاچاق قيلينمه يدي.

كنر حاكمي گه كوره، سونگي ده افغانستان كانلر وزيرليگي مملكت شركتلريدن بيري بيلن كنرده گي كروميت دن يوز مينگ كروميت قانوني روشده قه زيب چيقه ريليشي باره سيده كيليشوونامه امضاله گن.

جلاله جنابلري نينگ تاكيدلشيچه، كيليشووگه بنآ؛ مذكور شركت بير تون كروميت ني 135 دالرگه ساتيب آله دي و دولتگه هر بير تون دن 15 فايز ساليق توله يدي.

اونگه كوره، بو كيليشوو، كروميت نينگ قانوني روشده قه زيب چيقه ريليشي گه سبب بولگن.

افغانستان شفافيت ني كوزه تووچي اداره سي، كروميت دن كيليب توشه ديگن مبلغ نينگ كوپ قسمي قوراللي گروه لرنينگ چونته گيگه توشيشي ممكنليگي باره سيده تشويش بيلديرگن.

بو اداره شونينگديك، بو معما نينگ آلديني آليش اوچون افغانستان دولتي تمانيدن تدبير كوريب چيقيلگن، اما محلي پوليس نينگ اره لشمسليگي اوچون جدي چاره تدبير آلينيشي ني تكليف قيلگن.