' افغانستان جنوبيده باله لر شل كسلليگي يوق قيلينگن'

Image caption شل كسلليگي هنوز هم افغانستان، پاكستان و نايجريا ده موجود

افغانستان ساغليق ني سقلش وزيرليگي اوتگن بير ييل ايچيده افغانستان جنوبيده شل كسلليگيدن هيچ بير واقعه خبر قيلينمه گني ني اعلان ايتگن. اوتگن ييللرده افغانستان جنوبيده بو كسلليك واقعه سي موجودليگي حقيده خبر نشر ايتيلگندي.

افغانستان ساغليق ني سقلش وزيرليگي بو ييل وزيرليك تمانيدن آليب باريلگن تيكشرووگه بنآ، مملكت شرقيده گي نورستان و كنر ولايتلريده فقطگينه 9 باله شل كسلليگيگه چيلينگن.

بو وزيرليك تمانيدن نشر ايتيلگن خبرنامه ده، 2012 ييلده مملكت بويلب 37 باله شل كسلليگيگه چلينگنليگي قيد ايتيلگن.

افغانستان ساغليق ني سقلش وزيرليگي، قندهار و هلمند ولايتلري باله لر شل كسلليگي كوپراق اوچره يديگن ولايتلردن ايكني ني ايتگن، اما جاري ييلده بو ايكي ولايتده هيچ بير باله شل كسلليگيگه دچار بولمه گن.

خانم ثريا دليل، ساغليق بوييچه خذمت كورسته ياتگن برچه خادملردن كيله سي آيلردن بو كسل بوتونلي يوق قيلينيشي اوچون جدي سعي و حركت قيليشيني سوره گن.

بو وزيرليككه كوره، دنيا ساغليق ني سقلش تشكيلاتي و باله لرني حمايه ايتووچي صندوغ ياردمي بيلن كوپچيليك باله لرگه شل كسلليگگه قرشي ايملش واكسيني عملگه آشيريلگن.

دنيا ساغليق ني سقلش تشكيلاتي نينگ افغانستانده گي نماينده سي ريچارد پيپركارن، قندهار و هلمند ولايتلريده گي يوتوقلر ساغليق خادملري، جماعه ياش اولوغلري، مذهبي شخصيتلر، عاموي اخبارات واسطه لري و باله لر آته آنه سي نينگ سعي و حركتي طفيلي قولگه كيلگني ني تاكيدله گن.

او بو كسلليك نينگ شرقي ولايتلرده موجودليگي، قيته دن باشقه جنوبي ولايتلرگه چلينيشيگه سبب بوليشي ممكنليگي باره سيده آگاه لنتيرگن.

باله لر شل كسلليگي علاج سيز،اما آلديني آليش امكاني موجود. بو كسلليك تقريبآْ بوتون دنياده يوق قيلينگن، فقطگينه اوچ مملكتده اوني يوق ايتيش اوچون حركت دوام ايتماقده.