جوزجانده یوزلب طلبه خوفسیزلیک پیمانگه قرشی نمایش اویوشتیردی

نمایشچیلر، مصلحتی لویه جرگه و خوفسیزلیک پیمانگه قرشی شعار بیریشگن.

بو نمایش جوزجان بیلیم یورتیده باشلگن و نمایشچیلرنینگ اکثریتی طلبه لردن عبارت بولگن.

نمایشچیلرامریکا وافغانستان اورته سیده امضالنیشی کوتیله یاتگن حجت نی اسلام قیدیریتلریگه قرشی دیب، امریکا حربیلریگه قضایی مصوونیت بیریلیشینی قاره لشگن.

نمایشچیلر، امريكاليك كوچلري بيرگن وعده لريگه عمل قيلمه ي، اوز باشيمچه عملياتلرني يولگه قويه دي و تينچ اهالي اويي جايلري ني نامعقول و ناتوغري شكلده تینتاو قیلیشيني تاكيدلشگن.

عين حالده بيرقطار جوزجان ده بيرقطار اهالي مصلحتي جرگه ده مليونلب دالر صرفله نيب، اولكه اقتصاديگه ييريك زيان ايكني ني ايتيب، جرگه ده آلينه ياتگن قرارلر هيچ پيت افغانستان منفعتي گه بولمه گني ني تاكيدلشگن.

شونگه قوشيمچه باشقه بيرقطارجوزجان اهالي سي امنيتي پيمان امضالنيشي ني افغانستان كيله جگي اوچون مهم ديب، اولكه نينگ ترقيات و قيته قوريش ايشلريگه ايجابي آديم بوليشي ممكنليگي باره سيده اميد كورستيشگن. بو اهالي گه كوره، امريكا بيلن خوفسيزليك بيتيم امضاله نيشي ياردم لرنينگ دواميگه ايجابي تاثير قوييب، اورته گه قوييگن شرطلر اولكه ترقياتي وخوفسيزليگي اوچون مهم.

امريكا و افغانستان آره سيده گي امنيتي پيمان امضا لنيشي اوچون تشكيل ايتيلگن مصلحتي لويه جرگه گه مملكت بويلب 2500 نماينده چقيريليب، 4 كون ايچيده اولر ايكله مملكت ارا خوفسيزليك كيليشوونامه امضالنيشيگه آواز بيريشدي.

لويه جرگه نينگ قراري جمهور رييس نينگ امضاسيدن سونگ، نتيجه گه ايريشه دي. بوگون اوز نهايه سيگه ييتگن جرگه نينگ سونگي ده جرگه رييسي صبغت الله مجددي جمهور رييس كرزي دن كيليشوونامه ني تيزليك بيلن امضالشيني سوره دي.

عين دمده بوگون طالبان گروهي عاموي اخبارات واسطه لريگه مكتبوب يوللب، بوليب اوتگن جرگه ني قلبكي و عامه آنگيني چلغيتيش اوچون برپا ايتيلگني ني ايتيب، اوني قاره لشگن.

بوندن آلدين هم كابلده جرگه و خوفسيزليك كيليشوونامه گه قرشي نمايش اويوشتيريلگندي. اما حاضر بو كيليشوونامه قچان امضالنيشي معلوم ايمس.

Бу мавзуда батафсилроқ