بیرلشگن ملتلر تشکیلاتی 'مجنوني' دن واز كيچمه گن 'ليلي' ني حمايه ايتماقچي

عرافتيني ديب، سعودي عربستاني دن سيوگيليسي نينگ آنه وطني يمنگه قاچگن هوده گه سياسي باش پنه بيريليشي ممكن. بيرلشگن ملتلر تشكيلاتي خوددي شو مسله حل بولگنگه كوره، اوني اوز حمايه سيگه آليشگه قرار قيلگن.خلق ارا تشكيلات قاچقينلر بوييچه عالي كميساري وكيلي نينگ بي بي سيگه ايتيشيچه، هوده باش پنه سوره ب اوزلريگه مراجعت قيلگن.باش پنه سوره گن شخص مقاميده بولگن انسان ني ايسه، هيچ كيم مجبورآ آرتگه ديپورت ايتيش گه حقلي بولمه يدي.مسووللرگه كوره، آنه وطني سعودي عربستانيده يقينلري نينگ، حتي اوني اولديريشلري خوفي بولگني اوچون هم هوده گه سياسي باش پنه بيريليشي ممكن.همه بوگونگي كون نينگ"ليلي و مجنون" ياكه "راميا و جوليته" سي ديب قره ياتگن ايكاولان نينگ محبت داستانلري يمنده همه نينگ دقت اعتباريگه توشگن.همه سي قنده ي باشلنگن ايدي؟ييگيتچه ني بير قره شده سيويب قالگن قيزگينه آته سي نينگ قهريگه اوچره يدي. هه، وقت كبي كهنه ينه بير عشق قصه سي.

اما ليلي و مجنون ياكه راميا و جوليته دن اولرنينگ بير فرقلي جهتلري بار، قنقه ديسنگيز،

حكايه ميزگه قولاق توتينگ:

بير بار ايكن، بير يوق ايكن. حكايه ميزنينگ ابتداسي سعودي عربستانيده باشلنگن ايكن.

حاضر 22 ياشده بولگن هوده، تقديرنينگ حكمي ني قره نگ كهف بير كون قيشلاغيده گي قول تيلفونلري بيلن سودا قيلاوچي دكانچه گه كيريب قاله دي.

هوده اوزي نينگ " مجنوني " كمبغلگينه عايله دن بولگن يمنليك محنت مهاجري 25 ياشلي عرافت ني خوددي شو ييرده اوچره تيب قاله دي.

بير قره شده محبت، ديگنلري شو بولسه كيره ك، ايكاولان دكانچه نينگ اوزيده بير بير لريگه كونگيل قوييب قاليشه دي.

اگر، عاشق ـ معشوق حمايه چيسي نينگ سوزلريگه قره لسه، عرافت رسم و رسوميني جاييگه قوييب، سيوگيليسي هوده نينگ آته سيدن قيزي نينگ قوليني سوره يدي.

اما، قيزگينه نينگ آته سي كمبغلليگيني يوزيگه ساليب، عاشق ييگيتچه گه رد جوابيني بيره دي.

اوزي نينگ باشيگه توشگن سودالر بيلن يوتوبيده اورتاقلشگن هوده گه كوره، "آته آنه سي اوزيني باشقه گه بيرماقجي بوله دي، بيراق او عرافت دن اوزگني ديمسليگيني ايتيب، آياق تيره ب آله دي".

"انه شو مشمشه دن كيين مينده اويدن قاچيب كيتيش فكري توغيلدي"، ـ دييدي هوده.

ايكي اوت ايچيده قالگن هوده توگونچه سيني آله دي يو، يمنليك ايشچي نينگ كييميده سعودي عربستاني چيگره سيني كيسيب اوته دي.

اما يمنگه اوتيشي بيلن بو ناقانوني خط حركتي اوچون محلي مسووللر تمانيدن قولگه آلينه دي.

يوز بيرگن حادثه دن خبر تاپگن هوده نينگ آته آنه سي همه سيده "قيزلري نينگ باشيني ايلنتيريب آلگن" عرافت ني عيبلشه دي.

هوده گه ياردم بيريش اوچون آنه وطني يمنگه قيتگن عرافت نينگ باشيگه هم سيوگيليسي نينگ كوني توشه دي. اوني هم درحال حبسگه آليشه دي.

اولرنينگ باشيگه توشگن كورگوليكلر يمنده "فسبوك" فايده لنووچيلري آره سيده كته عكس صداگه سبب بوله دي.

همه عاشق ـ معشوقلرنينگ صحيفه سي يو صورتلري بيلن بوليشيب كيته دي. اولرنينگ صورتلريني ياقتيرگنلر ساني قريب 10 مينگگه ييته دي.

قالديريلگن ايضاحلر ايسه، حتي كه، ملتچيليك توسيني هم آليب كيته دي. ايريم يمنليكلر بوني بدولت قوشنيلرنينگ ديماغدارلريگه يويشه دي.

ايكي ياش بيلن يوز بيرگن بو كبي حادثه باشقه لريگه عادي يمنليكلر او حقلريني طلب قيليب كوچه لرگه چيقيشگن 2011 ييلگي خلق عصيانيني ايسله تيب يوباره دي.

"قيز باله باشي بيلن محلي عرف عادت لرگه قرشي چيققني اوچون هم همه هوده نينگ يانيني آلماقده" ـ دييدي كونده ـ شونده ليك " فسبوك" فايده لنووچيسي بولگن 33 ياشلي فحد.

"هوده ايرككلرنينگ سوزي سوز بولگن بير جمعيت ده اوزي ايسته گن كيشيگه تورموشگه چيقماقچي بولدي. بيزنيكيگه اوخشش جمعيتلرده آدملر اوز ايركه و حق حقوقلريگه ايگه ايمس. يوز بيرگن حادثه جمعيتلريميزنينگ جدي اصلاحاتلرگه محتاجليگيني كورسته دي"ـ دييدي او.

بوگون يكشنبه كوني هوده و عرافت نينگ اوستيدن محكمه جرياني بوليب اوته دي.

فحاد ايسه، محكمه بناسي قرشي سيده عاشق معشوق لرنينگ حمايه سيگه ناراضيليك نمايشي اويوشتيرماقچي.