افغانستان اولوسي جرگه بير اعضاسي خودكش هجومده يره لندي

اولوسي جرگه اعضاسي حميدالله توخي، بوندن آلدين طالبانگه قرشي جنگ جبهه لريده فعاليت يوريتگن. كابل پوليسي بير خودكش هجومچي زابل اهاليسي نينگ اولوسي جرگه ده گي نماينده سي حميدالله توخي اوييگه كيريب، اوزيني پارتله تيب يوبارگنيني تصديقله گن.

كابل پوليس قومانداني جنرال ظاهر نينگ بي بي سيگه ايتيشيچه، توخي جنابلري يوزيدن يره لنيب، ايكي يولداشي بيلن شفاخانه گه ييتكزيلگن.

خودكش هجومچي پارتلاوچي ماده ني سله سيگه جايلشتيريب، حميدالله توخي نينگ قوريقچيلري تيكشيرگن دن سونگ، اوييگه كيريب پارتله تيب يوبارگن.

بو حادثه كابل شهري نينگ بهارستان محله سيده ساعت كيچقرون تورت ده يوز بيرگن.

هنوزگچه بو حادثه مسووليتي ني هيچ بيرگروه اوز ذمه سيگه آلمه گن.

توخي بوندن آلدين ميدان وردك و زابل ولايتلريده حاكم صفتيده وظيفه بجرگن.

سله گه ماين جايلشتيريش بوندن آلدين هم يوزبيريب، مخالفلر بو ينگي تكتيك فايده لنماقده لر.