بيرلشگن ملتلر تشكيلاتي افغانستانده ياردم ييتكزووچيلرگه قرشي تهديدلر آشه ياتگنيدن تشويشده

بودن جنابلري نينگ ايتيشيچه، افغانستان خوفسيزليك مسووليتلرني تاپشيريش اينگ قتيق بير باسقيچده ايكني گه قره مه ي، بو مملكت نينگ بشري ياردملرگه احتياجي كوپه ييشي احتمالي موجود.

بيرلشگن ملتلر تشكيلاتي انسان پرورليك تشكيلاتلرخادملريگه قرشي تهديدلر آشيب باره ياتگني باره سيده آگاه لنتيريب، اوني خارجي كوچلر افغانستان ني ترك ايته ياتگن بيرچاغده تشويشلنرلي ديه تاكيدله گن.

بيرلشگن ملتلر تشكيلاتي نينگ افغانستان ده بشري ياردملرني موافقلشتيرووچيسي مسووللریدن مارك بودن، بو جريان باره سيده قتيق تشويشده من. افغانستان دنيا ياردملريگه قتيق محتاج بولگن بير پيتده تهديدلر آشيب بارماقده، دييدي.

بيرلشگن ملتلر تشكيلاتي سونگي كونلرده نادولت تشكيلاتلرنينگ 12 خادمي ايكي عليحده حادثه ده شمالي فارياب ده قوراللي شخصلر تمانيدن اولديريلگن بير پيتده تشويش بيلديرماقده.

شو مسله گه قرشي فارياب ولايتيده يوزلب اهالي نمايشگه چيقيب، پوليس قومانداني وظيفه سيدن چيتلنتيريليشي ني سوره گن.

بوندن اوچ كون آلدين فرانسه اكتيد تشكيلاتي نينگ 6 خادمي افغانستان شمالي ده اولديريلدي.

بيرلشگن ملتلر تشكيلاتي تمانيدن نشر ايتيلگن حساباتگه كوره، ييل باشيدن حاضرگه قدرافغانستانده 73 نفر ياردم بيرووچي خيريه خادمي اوليب، يره لنيب، ويا هم اوغيرلنگن. بو تعداد 2012 ييلگه قره گنده نيچه برابر آشگني ني كورسته دي.

بوندن تورت كون آلدين افغانستان جنوبي ده روي بيرگن بير علحيده حادثه ده اوچ ياردم بيرووچي خادم ماين گه دوچ كيليب هلاك بوليشگن.

بيرلشگن ملتلر تشكيلاتي، افغانستان بو ييل جمعآ 36 خادمي حياتي ني قولدن بيرگني ني ايتگن.

ايتيليشيچه، خارجي كوچلر كيله سي ميلادي ييل نينگ اداغيگچه افغانستاننی ترك ايتيب، افغانستان خوفسيزليك كوچلري جنگريلرگه قرشي بوتون عملياتلر مسووليتلريني اوز ذمه سيگه آليشي ممكن.