میدان وردک ده یوزبیرگن انتحاری هجومده تورت کیشی اولیب 19 کیشی یره لندی

میدان وردک ولایتی نینگ ولایت حاکمی سوزچیسی عطاالله خوگیانی گه کوره، اوشبو ولایت نینگ نرخ تومنیده یوزبیرگن انتحاری هجوم نتیجه سیده تورت پلیس هلاک بولیب و 19 کیشی یره لنگن.

خوگیانی جنابلری بی بی سی بیلن بولگن صحبتیده انتحارچی شخص پارتلاوچی ماده جایلشتریلگن موترنی اوزی بیلن نرخ تومنی نینگ پلیس اداره سی بناسی مقابلیده پارتلگنینی ایتدی.

خوگیانی جنابلری نینگ ایتیشیچه، هلاک بولگن لردن اوچته سی پلیس ضابطی بولگن. یره لنگن لردن ایککیته سی باله وباشقه قالگنی پلیس خادملری ایکنی تصدیق لنگن. اولردن تورته سی وضعیتی آغیر بولگنی ایتیلماقده.

شونینگدیک حاکم سوزچیسی پارتلش نتیجه سیده پلیس بناسی قوشیمچه ایریم اویلر هم خساره کورگنینی معلوم قیلگن.

حاضرگه قدرهم هیچ بیر گروه یاشخص حادثه مسوولیتینی اوز بوینیگه آلمه گن. اما محلی مقاملر مذکور هجومنی عصیانچیلرگه نسبت بیرگن.

پایتخت کابل قوشنی لیگیده جایلشگن میدان وردک ولایتی نینگ ایریم منطقه لریده عصیانچی گروه لر انچه فعال بولگنی ایتیلماقده.