امريكانينگ پاكستان آرقه لي افغانستان گه كيله ياتگن تآمينات كرواني توخته تيلگن

امريكا مدافعه وزيرليگي (پنتاگون) خوفسيزليك تشويشلر و پاكستانده گي عمومي اعتراضلر اوچون، پاكستان نينگ تورخم چيگره بندري آرقه لي افغانستان گه كيله ديگن تآمينات كروانلري توخته تيلگني ني ايتگن.

امريكا بوقرار ني پاكستان ده اوچووچيسيز اوچاقلري نينگ هجومي گه قرشي غضبلي اعتراضلر باشلگني و بو مسله اولرنينگ يوكلرني ته شووچي موترلر حركتي آلديني آلينيشيگه سبب بولگني اوچون آلينگني باره سيده تاكيدله گن.

امريكا و اونينگ افغانستانده گي اتفاقداشلري نينگ كميده يريم قسم تامينات جهازلري پاكستاندن افغانستانگه ييتكزيله دي. بو جهازلرنينگ اينگ مهم قسمي «خيبرپشتونخواه» ايالتي و تورخم بندريدن اوته دي. اما بو منطقه ده امريكاگه قرشي اعتراضلر شدتلنگن.

سونگيده پاكستان تحريك انصاف حزب رهبري عمران خان، امريكا اوچووچيسي اوچاقلري نينگ هجوميني توختتمه گن تقديرده، خيبرپشتونخواه ايالتيده ناتو تآمينات كرواني يوليني توسيش اوچون عمومي اعتراض لرني يولگه قوييشي باره سيده آگاه لنتيرگندي.

عمران خان امريكا ني پاكستانليك طالبان رهبري حكيم الله محسود ني اولديريش بيلن، طالبان بيلن آليب باريله ياتگن صلح مذاكره جريانيگه ضربه اورگنليكده عيبله گن.

سه شنبه كوني پنتاگون سوزچيسي مارك رايت، مذكور يول كيله سي يقين كونلرده قيته دن آچيليشي باره سيده اميد بيلديردي.

او خيبر يولي نينگ وقتينچه ليك ياپيلگني، افغانستان ده گي امريكاليك كوچلريگه تآمينات نقطه نظريدن ضرر ييتكزمه يدي ديدي.

پاكستاندن ناتو تامينات كروانلري اوته ديگن باشقه بير يول بلوچشتان ايالتي چمن يولي همان آچيق.