افغانستان ـ تاجيكستان مخدرماده قاچاقيگه قرشي همكارليك كنفرانس اوتكزدي

Image caption اخبارات واسطه لري افغانستان و تاجيكستان چيگره حدودلريده قاچاقچي گروه لر تمانيدن گروگه آليش ايشلري دوام ايتديريله ياتگني حقيده خبر نشرايتگن،

تاجيكستان پايتختي دوشنبه كنفرانسيده قتنشگن افغانستان ايچكي ايشلروزيرليگي نينگ مخدرماده لرگه قرشي كوره ش معاوني باز محمد احمدي، افغانستان و منطقه مملكتلري مخدرماده لرقاچاقيگه قرشي كوره شني همه دن اوستون يولگه قوييشي ني نظرده توتگني ني تاكيدله دي. او مذكور كنفرانس نتيجه لريني ثمره لي بهاله دي:"بختگه موافق بيز بو اوچ كونليك كنفرانسده مخدرماده لرگه قرشي كوره ش اصوللري كيريتيلگن 19ماده لي كيليشووگه ايريشديك، بو اصوللر كوريب چيقيلگندن كيين ايكله مملكتلر اورته سيده عملگه جاري قيلينه دي. بيز بو ماده لر اساسيده، چيگره لرني كنترول و ايكله چيگره اهاليسي حياتي يخشيلنيشي اوچون كوره شه ميز".

احمدي جنابلري، ايكله مملكت اروته سيده دولت مخصوص كميسيون ايجاد ايتيليشي، مخدرماده لرقاچاقيگه قرشي لايحه لرنينگ اساسي روشده عملگه آشيريليشي اوچون چيگره ولايتلر و تومنلرده ايش گروه لري تشكيل ايتيليشي اوستيده هم كيليشيب آلينگني باره سيده تاكيدله دي.

عين حالده، ايريم اخبارات واسطه لري افغانستان و تاجيكستان چيگره حدودلريده قاچاقچي گروه لر تمانيدن گروگه آليش ايشلري دوام ايتديريله ياتگني حقيده خبر نشرايتگن، اما افغانستان ايچكي ايشلر وزيرليگي معاوني باز محمد احمدي، قاچاقچيلرارا معامله صفتيده افغانستان گه آليب كيلينگن تاجيكستانليك ايكي ياش عيال دن باشقه افغانستان و تاجيكستان چيگره سيده هيچ بير گروگه آليش حاللري يوز بيرمه گن و افغانستان تماني تشكيللشتيريلگن گروه لرني حبسگه آليش بيلن بومسله ني حل ايتگن دييدي.

اونگه كوره، افغانستان دولتي مذكور عياللرني تاجيكستانگه قيته ريشگه اورينگن، اما بو عياللر تاجيكستانگه قيتيشني ايستمه ي، افغانستانده كون كيچيريشلريني طلب قيليشگن، چونكه اولر ايكي افغانستانليك بيلن تورموش قوريشگن.

باشقه تماندن، تاجيكستان مخدرماده لرگه قرشي كوره ش اداره سي رييسي توره بيك رستموف، بو اوچ كونليك كنفرانس 2005 ييلده افغانستان و تاجيكستان اورته سيده عملگه آشيريلگن ايكي تمانلمه كيليشوونامه گه بنآ برپا ايتيلگني دييدي:"29 نوامبر ده تاجكستانده بير مهم ييغين اوتكزيلگندي، بوگونگي اوچ كونليك كنفرانسده مخدرماده لرگه قرشي كوره ش اداره لر نماينده لري بو حادثه ني آلديني آليش اوچون چاره تدبير كوريب چيقيشگه ييغيليشگن و بوخصوصده ايشلر تيزلشتيريلگن".

بو كنفرانسده بيرلشگن تشكيلاتي نينگ مخدرماده لرگه قرشي منطقه وي مسوولي جيرمي ميليسون، منطقه ده مخدرماده لرگه قرشي كوره شده موفقيتليك قولگه كيگن، اما اونگه كوره ، بو كوره شلر ييترلي بولمه گن:"بو حادثه گه قرشي كوره ش ني كوچيتيريش اوچون قانون هم كوچه يتيريليب، كينگ قمراولي لايحه لر عملگه آشيريليشي كيره ك. بيز بو كنفرانس و ايش و نتيجه لريدن خرسند ميز. چونكه كنفرانسده چيگره داش بو ايكله مملكت اورته سيده مخدرماده لرگه قرشي كوره شيش اوچون همآهنگليك كوچيدي".

مذكور كنفرانسده شونينگ ديك، افغانستان وتاجكستان مخدرماده لرگه قرشي كوره ش اداره لري نينگ نماينده لري موجود معمالر حل و تيكشيريليشي اوچون كيله جكده هم ايكي تمانلمه ييغينلر برپا ايتيليشي ني تكليف ايتيشگن.

افغانستان و تاجيكستان ارا همكارليك كنفرانسده افغانستان تمانيدن كميده 40 نفر اشتراك ايتگندي.