كابل ـ جلال آباد يولي ايكي طرفه قيليب قوريله دي

افغانستان فوايد عامه وزيرليگي كابل ـ جلال آباد يولي نينگ باشقه بير طرفي قوريليش شرطنامه سي ني افغان ـ چين قوشمه بير شركت بيلن امضاله گنيني اعلان قيلگن. بو يول پايتخت كابل ني افغانستان شرقي ده گي ولايتلر بيلن باغله يدي. فوايد عامه وزيرليگي نينگ مطبوعات خذمتي مسوولي نجيب الله احدي نينگ بي بي سي گه ايتيشيچه،100 كيلومتر مسافه ده قوريله ديگن كابل ـ جلال آباد يولي نينگ ايكينچي طرفي ني قوريشده 110 ميليون دالر صرفلنه دي. اونگه كوره، بو مبلغ آسيا ترقيات بانكي تمانيدن توله نيله دي و بو يول اوچ ييل ايچيده بيتكزيله دي. بو يول اوتيشي قيين بولگن ماهي پر بوغيزيدن اوتيب، افغانستان نينگ اينگ تيقينچ باردي كيلدي يوللريدن حسابلنه دي. مذكور جاده، كابل ني افغانستان شرقي ولايتلري همده تورخم بندري طريقيدن پاكستانگه باغله يدي. پاكستان توارلري همده پاكستان آرقه لي افغانستان گه كيله ديگن برچه توارلر، شو يول آرقه لي كابل و مملكت نينگ باشقه ولايتلريگه ييتيب باره دي. بو ييل آچيليش مراسميده افغانستان ماليه وزيري عمر زاخيلوال، بو يول نينگ قوريليشي افغانستان اقتصاديگه هم ياردم بيريشي ممكنليگي باره سيده تاكيدله دي. زاخيلوال جنابلري گه كوره، افغانستان نينگ زراعت محصولاتلري اينيقسه ميوه، يول نينگ صفتي يامانليگي باعث بوزيليب، مملكت اقتصاديگه كته ضرر ييتكزيشي ني ايتدي. آسيا ترقيات بانكي نينگ افغانستان ده گي نماينده سي جوجي تاكاشي، بو بانك طالبان قوله تيلگني دن كيين بو مملكتده يول قوريش، برق ييتكزيش، تيمير يول و زراعت ساحه لريده افغانستان گه كميده 3.5 ميليارد دالر ياردم قيلگني ني اعلان قيلگن. افغانستان نينگ اوچ مينگ و بيش يوز كيلومتر يولي اسفالت قيلينگن، اولرنينگ كوپچيليگي اوتگن بير دهه ايچيده قوريلگن. اما بو يوللرنينگ اكثريتي اسفالت صفتي يامانليگي سبب، قيته دن ويران ايتيلگن. افغانستان فوايد عامه وزيرليگي مسووللري هردايم مملكت يوللري امريكا معيارلريگه اساسلنيب، قوريلگني ني اعلان قيليشه دي، اما آغير يوكلنگن موترلر نظارت ايتيلمه گني، بو يوللرنينگ بوزيليشيگه سبب بولگن. افغانستان فوايد عامه وزيري نجيب الله اوژن، اسفالت صفتي بو وزيرليك وباشقه اداره لرتمانيدن جدي نظارت ايتيليشيني تاكيدله دي.