افغانستان ده دالرنرخي مثلي كوريلمه گن درجه ده كوته ريلگن

Image caption دلاوري جنابلري، دالر نينگ افغاني برابريده بازارلرده قيمتلشگنيگه امريكا بيلن خوفسيزليك كيليشوونامه امضالنمه ي ياتگني سبب بولگني ني ايتگن.

افغانستان مركزي بانك رييسي، خوفسيزليك كيليشوونامه امضالنيشي بيلن دالر نرخي پسه ييشي گه اميدوارميز دييدي.

مركزي بانك رييسي نورالله دلاوري دالرنينگ نرخي آشگنيگه اهالي نينگ اوز كيله جگيگه نسبتآ تشويش بيلديره ياتگني ني سبب قيليب كورستگن.

حاضرگي كونده كابل و مملكت بازارلريده بير امريكا دالري 58.30 دن 58.50 افغانيگه المشتيريله دي. بوندن آلدين هر بير امريكا دالري 56 افغانيگه ساتيلردي.

اوتگن ييللرده هم افغانستان بازارلريده بير دالر 60 افغانيگه المشتيريلردي، اما بو وضعيت بونچه هم چوزيلمه گندي.

مملكت رسميلري افغانستان امريكا بيلن خوفسيزليك كيليشوونامه امضاله گن حالده، اهالي نينگ كته قسم تشويشلري برطرف ايتيليب، دالر نرخي 51 افغانيگه پسه يشي ممكنليگي ني ايتماقده لر.

افغانستان مركزي بانك رييسي نورالله دلاوري نينگ بي بي سيگه ايتيشيچه، افغانستان خوفسيزليك كيله جگي باره سيده خوش خبرليك پيدا بولگن حالده،دالر نرخي قيته دن پسه ييشي ممكن.

دلاوري جنابلري، دالر نينگ افغاني برابريده بازارلرده قيمتلشگنيگه، اهالي نينگ سيلاولر بوليب اوتيشدن بيلديره ياتگن تشويشي، كيله سي ييلده خارجي قشونلرنينگ افغانستان ني ترك ايتيشي و امريكا بيلن خوفسيزليك كيليشوونامه امضالنمه ي ياتگني سبب بولگني ني ايتگن.

افغانستان دولتي اوز خزانه سيده 7 ميليارد و تورت يوز ميليون دالري بار. بو پول ني فوق العاده حالتلر همده احتمالي بحرانلرني آلديني آليش اوچون ذخيره قيليب قويگن.

آلدينراق افغانستان جمهور رييسي حامدكرزي كابل ده بير خبري ييغينده مملكت ذخيره گاهيده 6 ميليارد دالر موجودليگي ني ايتيب، دنيا هم جمعيتي ياردمي اوزيليب قالگن تقديرده، باشقه ييلگچه بو مبلغ دن فايده لنيشي ني تاكيدله دي.