جان كيري: خوفسيزليك پيمانني كيله سي جمهور رييس بيلن امضاله يميز

Image caption امريكا دولتي 2014 ييلگچه يعني قشونلري افغانستانني ترك ايتمسدن آلدين خوفسيزليك پيمان امضالنيشي ني تاكيدلماقده.

امريكا تشقي ايشلروزيري جان كيري افغانستان و امريكا ارا خوفسيزليك پيمان اوز وقتيده امضالنيشي باره سيده تاكيدله ياتگني گه قره مه، بوني افغانستان كيله سي جمهور رييسي بيلن امضاله شي ممكنليكي ني ايتگن. اونگه كوره، اولر افغانستان جمهور رييسي حامدكرزي بيلن پيمان امضالنيشي اوستيده كيليشه آلمه گنلر.

امريكا دولتي 2014 ييلگچه يعني قشونلري افغانستانني ترك ايتمسدن آلدين خوفسيزليك پيمان امضالنيشي ني تاكيدلماقده.

افغانستان جمهور رييسي امريكا بيلن پيمان امضالنيشي مسله گه عايد لويه جرگه اوتكزيب، اونده جرگه اعضالري پيمان امضالنيشيگه قرار قبول قيليشدي، اما حامدكرزي باشقه بير نيچه شرطلرني اورته گه قويدي.

امريكا دولتي حربي كوچلري افغانستان ني 2014 ييلده ترك ايتمسدن آلدين افغانستان بيلن استراتيژيك پيمان امضالب، اونينگ اساسيده بيرقطار كوچلري افغانستان خوفسيزليك كوچلريني تيارگرليك دن اوتكزيشده ياردم بيريليشيني تاكيدله ماقده.

اما واشينگتن، پيمان امضالنمه گن تقديرده اوزي نينگ افغانستانده گي برچه قوشونلريني آليب چيقيشي ممكنليگي باره سيده آگاه لنتيرگن.

امريكا تشقي ايشلروزيري جان كيري، اوزي نينگ مطبوعات بيلن اوتكزگن صحبتيده، ايكي تمانمله خوفسيزليك پيمان امضالنيشيگه جدي احتياج بارليگيني ايتيب، پيمان نينگ تيزليك بيلن امضالنيشي باره سيده اميد بيلديرگن.

او، امريكاليك كوچلر 2014 ييلده افغانستان ني ترك ايتگن دن كيين، افغانستان خوفسيزليك نقطء نظريدن جدي معما گه روپه ره بوليشي ممكنليگي ني تاكيدله گن.

اوشونينگ ديك، امريكا افغانستان نينگ حاضرگي جمهور رييسي حامدكرزي بيلن پيمان امضالنيشي اوستيده كيليشيب آلالمه گن حالده، كيينگي جمهور رييس بيلن بو پيمان ني امضالشيني ايتگن.

جان كيري گه كوره، حامدكرزي كيليشيلگن شرطلردن بولك علاوه گي باشقه قطارشرطلرني اورته گه قوييب، مذكور شرطلر امريكا تمانيدن قبول ايتيلمه گونچه، پيمان گه قول قويمسليگيني تاكيدله گن.

عين حالده، حامدكرزي اوتگن شبنه ده اوزي نينگ هندوستانگه قيلگن سفريده، امريكا ني اوني خوفسيزليك پيمان امضالنيشي باره سيده تهديد قيله ياتگنليكده عيبلب، بو تهديدلر دن قورقيب، پيمانگه قول قويمسليگي ني تاكيدله گن.

افغانستان جمهور رييسي، هند مطبوعاتي بيلن اوتكزگن صحبتيده، امريكاليكلرگه ايشانمسليگي ني، اولرني افغانستان خلقيگه حرمت و اوينلريني تينتوو قيلمسليككه چقيرگن.

افغانستان امريكا بيلن خوفسيزليك كيليشوونامه امضالش مسله سي اوچون لويه جرگه برپا ايتدي. اما لويه اعضالري كيليشوو نامه امضالنيشي باره سيده قرار قبول قيليب، جمهور رييس كرزي دن پيمان ني تيزده امضالشني سوره دي. ليكن حامدكرزي امريكا دولتي افغانلر اويلريگه هجوملريني توختتمه ي، طالبان بيلن صلح مذاكره لريني كفالتلمه گونچه پيمان گه قول قويمسليگي حقيده آگاه لنتيردي.

اما امريكا تماني بو شرطلرني خوفسيزليك كيليشوونامه امضالنيشي اوچون علاوه گي شرط ديه تاكيدله ماقده لر.

افغانستان و امريكا ارا خوفسيزليك پيمان امضالنگن تقديرده، كميده 15 مينگ امريكا حربيسي و بير تعداد ناتوگه اعضا مملكتلر كوچلري حربي مآموريتلرده اشتراك ايتيش اوچون 2014 ييلدن سونگ، افغانستان ده قاليشي ممكن.

ناتو رسميلري، مذكور عسكرلر 2014 ييلدن كيين، افغانستان خوفسيزليك كوچلريني تعليم، مصلحت و حمايه ايتيش مسووليتيني بجريشيني تاكيدله ماقده لر.

مصلحتي لويه جرگه تمانيدن تصديقلنگن خوفسيزليك پيمان لايحه سيگه اساسآ، خارجي كوچلر 2014 ييلدن كيين بگرام، كابل، مزارشريف، هرات، شيندند، گرديز و هلمند ولايتلريده گي حربي قرارگاه لريده قاليشي ممكن.