سید انور انیق:کوره گانی نسلیدن صاحب قِران سلطانیمیز.

حاجی سيدعيسي اؤغلي سيد انورانيق 1364 قویاش ييلی،جدی آیی نینگ 24- کونی فارياب ولايتيگه قره شلي قيصار تومنی نینگ بيش باله قيشلاغيده، بير آیدین و روحاني عايله ده دنياگه كيلدي. باشلنغيج تعليماتني" نادم قيصاري" ليسه سيده آليب، اؤرته وسؤنگگي تعليمات دوره سيني ايسه ميمنه شهري " يوكسك خراسان" ليسه سيده اوقيدي.

او 1338 ييلی بو ليسه ني عالي درجه ده بيتيردي. 1384 ييلی عالي معلومات اوچون قرغیزستان جمهوريتيگه يوباريلدي. او مذكور اولكه ده، اقتصاد بوييچه فاكلته سي، قرغیز-تورک خلق ارا اجتماعی بیلیم لر انستیتوتی، خلق ارا علاقه لر بولیمینی میلادی 2011 ییلی عالی درجه ده لسانس اؤلراق اوقیب بیتیرگچ ماستر لیککه باشله دی.

او بیرینچی ماسترلیگینی اوروپا خوفسیزلیک و ایش بیرلیگی کمیسیونی، علملر اکا دیمیه سیده حکومت باشقروچیلیگی و اقتصادی رواجلنیش بولیمی بوییچه بیتیرر ایکن، ایککینچی ماسترلیگینی ایسه بیشکیک دولت انسانی علملر بيليم يورتيده، خلق ارا مناسبتلر و شرق شناسلیک بولیمی دن قولگه کیریتگن.

او آنه تیلی اؤزبیگچه نینگ یانیده، روسچه، انگلیسچه، تورکچه، فارسچه، پشتو و قرغیز چه تیللریده تولیق شکلده یازیب، بیتیب، اؤقیب سؤزله شه آله دی .

انور انيق شعر وادبياتگه قيزيقيب، آنه تيليده شعر يازيشگه باشله گن.

قوييده گي شعرلر اونينگ شعري نمونه لريدن:

آزاده خلـق اؤغـلانـيميـز

آلــــــغه قؤ ي ايركـــــين قدم آزاده لــيكده جانيمـــــيز،

حـــق سـيور،حـق يانـداشـي،حـق يؤلچيـسي انسانيـميز.

بيـزجـفا چيـككن ستـــم كـؤرگنِ ولي؛ يينگيـل مه گـــن،

كؤكـسي قـلقان بغـري كينگ آزاده خلـق اؤغـلانـيميـز.

بــــاقــمـه يـيـن بوحال زاريمـيز گه گـــرآواره ميــــــــز،

كون كـيلر يـاو ني ايـتر بـيرليـك تـوزر يـزدانـيمـــــيز.

يؤل اوزاق،مـقـصدبـويـوك،قـراقچـيلرپـيـستــيرمه ده،

واي كيم يـيتگه ي مي دير مقـصدساري كاروانيميز؟!

قؤرق منگ،قيغورمنگ تون بيتدي تانگ چاغي بودم!

يؤل باسيـنگ ارسـلان كبـي، ايـستربوگون دورانيميـز.

بـيـزشهـنـشــالـر شــهـي بابــر ،نـوايـي زاده لـــــــر،

ينــگي كوچ، ينگي اميـــد، ينـگي زمـان امـكانـيـمــيز.

ادعـا ايـرمــس بـوسـؤزيـم مـستـند آيـديـن" انيـــــــق"

کوره گانی نسلیدن صاحب قِران سلطانیمیز.

قـرغـه لــرگــه مـکان بــؤلــدی!

کُـوز نینگ ساووق یِیلی کیــلدی،

سَـــــرغَیـــتِیــِردی یاز یُـوزینــی.

اؤسیملیک لر تیـتره ب قَــقـشَـب،

تـوتالمـه ی قالــــــدی اؤزینـــــی.

کــؤک یـوزینـی بولــوت قاپـلب،

قـویاش نورین یَـشـــــیر تیــردی.

قـَـــرا بولــوت قؤرقُـــووســـیدن،

إیـل،إکیـنــــین یغیــشـتِـــــــیردی.

کــوزعســکری کیلـدی باســیب،

قِـیریـلــدی یَـپراق لــــر،اؤتــلــر.

گـــویا بـــو نیــنــگ مـاتــمیـــده،

کـؤز یاشــــین تـؤکــدی بولـوتلـر.

گـُل لر نینگ رنگـی سَرغَـیـدی،

تـؤکـیــلدی یِـیرگـه یَـپـراق لـــر.

قـرغـه لــرگــه مـکان بــؤلــدی،

بُـلبُـل دن اَیـریلــیــب بـاغ لــــر.

ای حریفلر

ای حریفلر بیلینگ هیچ نفع یؤق

یوره گیم گه قؤرقوو سالیشدن.

بار قؤرقوو ویم کؤ نگلیم ده گی چؤغ

آلاو لنمه ی اؤچیب قالیشدن

عصیان بیلن هم نفس یشش

میراث دیر بو , ازل دن مینگه

تیگمه, یانر بو سؤنگن آتش

تفتی ضرر لی دیر, قیل حذر, سینگه

اینده مسلیک, جیملیک, گویا راضی لیک

دیب اؤیله منگ غافل , إیل نینـــــگ قهری دن.

جانگه تیگدی جیملیک, تماشا بـینلیک,

قؤرقمه گه ی ساحر کیم ییلان زهری دن.

29 اوگست 2007- بیشکیک

آنه یورت

آی گه چیقیب قیتیب ییِرگه قره سم،

آی دن یاروق, تورکستان کؤرینر.

فاریابیم آنه یورتیم ،میمنم،

توپراغی زر، تاشی لعل دیک کؤرینر.

قیاس ایتسم قویاش ایله، یورتیم نی،

قویاش دن هم گوزه ل، یورتیم نورساچر.

لال قالر من کوُرسم سینینگ بهارینگ ،

گل موسُمی، گلزار اوزره دُرساچر.

ییٍراق کیتسم شاشیله من قیته ی دیب،

اّدِرلردن سه اولنگینگ ساغینیب.

شاشیله من میمنه م نی کؤره ی دیب،

آنه یورتیم سینی جاندن ساغینیب.

آنم سین سن مهریم تؤکیب هید لر من،

آتم سین سن ارداقله گن یاشلیک دن.

شعاریم سن، خیالیمد ن چیقمه گن,

قیمت إیمس جانیم، سینینگ تاشینگدن.

بیر لحظه هم کیتگُوم کیلمس اؤزینگ دن،

اؤیه م سین سن ،اوییم سین سن آنه یورت.

گُل یاپینیب گُلزار ایچره یشرسم ،

ساغینر من تیکان زارینگ آنه یورت.

۰۲ فبروری ۲۰۰۸ - استانبول، تورکیه

یا لغان قیش

قیش دیسم یاز دیک بو پیت.

کوز دیسم قنی یپراق,

سپسریغ ساووریلگن؟

چرچه دیم یا لغان قیشد ن.

قیش دیسم کوزدیک بو پیت.

کوز دیسم قیشنینگ چاغی.

اؤیلریم قول چراغ دیک,

أیسیمگه سالر اونی.

جدی ۱۳۸۳ میمنه

قدرتی چیکسیز

بسم الله الرحمن الرحیم

او یره تگن تینگریم مینینگ خداییم

یلغوز ذاتدیر دنیا یوزیده فقط.

یلغوزاودیرکوچلی, قدرتی چیکسیز,

عالم ده یوق اونگه تینگداش کیلر کوچ.

تینگری اؤزی, یره توچی یلغوزدیر

عالم لرنینگ أیگه سی,عقل بیردی ته نی دیب

مهربان دیر چیکسیز کوچی بار بؤلیب

کؤرستمیدی ظالم لرگه کوچینی.

05 سپتمبر 2006- آنکارا

دياريم گه سلام

باغ و بؤسـتان ني بـيزه ب كـيلگن بـهاريـم گه سـلام

گل ينـاقـلي دلـبريـم گلگـون عـذاريـم گـه ســـــــــلام

ميـن سـاري كـيلگه ي مي ديب چيكديم يؤليده انتظار

بيـر كـؤريـب يـوزين ديسم كؤزي خماريم گه ســلام

بيـنوا بلـبل كـبي گـرگل يـوزينـي كـؤرمـه ســــــــــم

باش آليــب كيتگـوم، ديبـان شهـروديـارـيم گـه سـلام

باغـده گل لـر آچـيلـيب گلشـنده قـوشـلر سـيره شـيب

تاغ وتاش خـرم بؤليـبديـر،ســبزه زاريم گـــــه سلام

يـــاردن اؤزگـــــه قيـله آلمــس بـودرديـم گــــــه دوا

اوطبــيبـيم هـم شفــاكاريـم نــــــــــگاريــم گه ســلام

توشدي عمــــــريم كيمه سي هجرانده غم دينگيزيگه

ناخـــــــــدادن ني مدد،پروردگاريم گه ســـــــــــلام

تــــينمه يين اوبي وفـا هـــــجريده ييغلب ديـر انــيق

لعلي خنـــدان كؤركه باي گل يوزلي ياريم گه سلام

۷ حوت ۱۳۸۲- میمنه