"زوروان شخصلر ینه ده سیلاولرگه تاثیر سالیشی ممکن"

بلخ ولايتي ولايت كينگش سيلاو نامزدلري سيلاو شفاف اوتكزيلمسليگي و قوراللي زوره وان شخصلر ينه ده سيلاولرگه تاثير ساليشي ممكنليگي دن تشويش بيلديريشگن.

اولر بوگون شو مسله گه قرشي كوره شيش و سيلاو برنامه لري باره سيده اهاليني خبردار قيليش مقصديده، ييغين اويوشتيريب، اوز ارا همكارليك و هم آهنگليك اوستيده كيليشيب آليشگن.

بو ييغينده نامزدلر اوز لايحه لريني قنده ي عملي قيليشي واهاليني اوز برنامه لايحه لري دن خبردار قيليش ، همده اهالي واوزلري نينگ سيلاولر شفاف بوليب اوتيشي باره سيده گي تشويشلريني دولتگه ييتكزيش مسله سي محماكمه ايتيلدي.

اما بو نامزدلر، سيلاولر شفاف بوليب اوتيشي اوچون هنوز هم قدرتلي شخصلرسيلاولرگه كته تاثير اوتكزه ياتگنيدن خواطر بيلديريشماقده. نامزدلردن بيري دوست محمد راغب:"اكت: بختگه قرشي خلققه صداقت بيلن خذمت قيلاوچي نامزدلر آلديده تورگن اينگ كته معما بو كوچسيزليك و كمبغلليك دير. بوگون جماعه ده زوره وانلر و قورال حاكميت قيله دي. بولر اهالي بيزنينگ زوريميز، پوليميز و قوراليميزني كوريب بيزگه راي بيريشه ديب اوتيريشگن. اولر اهالي بيزنينگ عقل وانديشه ميز گه ايمس، بلكه قوراليميز ني تن آله دي، دييشه دي".

بلخ ولايتي ولايت كينگش سيلاو نامزدلري شونينگ ديك، سيلاو ترغيبات كمپاين و آواز بيريش جريانلريده خوفسيزليك يامانلنيشي ممكنليگي باره سيده تشويش بيلديرماقده لر. اينيقسه عيال نامزدلر تومنلرگه باريب كمپاين قيله آلمسليگي ني يگانه مشكل ديه تاكيدله ماقده لر.

شونگه قره مسدن ايريم نامزدلر ولايت كينگش سيلاولري جمهور رييسليك سيلاوي بيلن بيرگه اوتكزيليشي، اولرنينگ آوازلريگه جدي بير شكلده قلابليك يوز بيرمسليگي ممليگي ني ايتيشماقده.بو نامزدلردن بيري زيب نسا خيري نامزدلر ارا همآهنگليك و همكارليك مستحكم لنگن حالده، سيلاو شفاف بوليب اوتيشيگه اميدوار.

كيريب كيله ياتگن جمهور رييسليك و ولايت كينگش سيلاولري شفافليگي و خوفسيزليگ مسله سي نه فقط نامزدلرنينگ تشويشيگه سبب بولگن بلكه اهالي هم شو مسله لر باعث، اشتراك ايتمسليكلري ممكنليگي حقيده آگاه لنتيرماقده.

بلخ ولايتي ولايت كينگش سيلاو لرده 123 كيشي اوزيني نامزد ايتيشگن، بولردن 16 ته سيني عياللر تشكيل ايته دي.