افغانستان كركت الف گروهي تاجیكستان ملي كركت تيميني قتيق شكست بيردي

افغانستان كركت الف گروهي تاجيكستان كركت ملي تيميني بيركونليك مسابقه ده قتيق شكست بيردي.اويين شرقي جلال آباد شهري غازي امان الله خان هوا ميدانيده اوتكزيلدي.ايلك بار دير كه افغانستانده بير مملكت نينگ ملي كركت تيمي بيله شوو مسابقه اوتكزدي.

تاجیكستان اويينچيلري مربي سي قاره كشليك ني كوته ريب، افغانستان تيميگه اويين ني باشله شيني تكليف قيلدي.

افغانستان الف اويينچيلري تعيين ايتيلگن قيرق آوره سيده ييتي اويينچيي ني مغلوب ايتيب، 290 بار ميدانگه يوگوردي و تاجيكستان ملي اويينچيلريگه 291 هدف ني تعيينله دي.

افغانستان الف اويينچيلري باشليغي جاويد احمدي، اويين ني يخشي آليب باردي و 116 هدف تعيينلشگه قادر بولدي.

شونينگ ديك، نجيب الله تره كي 93 هدف و شفيق الله شفق هم 32 هدف گه موفق بولدي.

تاجيكستان كركت تيمي اويينچيلري باشله نيشده، يخشي اوينشدي، اما افغانستان اويينچيلرگه برابرليك قيله آلمه ي، 28 اورولريني كويديردي.

اولر فقط 154 يوگوريشگه موفق بولدي، اما افغانستان 136 ترتيبيده اويين ني اوز فايده سيگه قره تدي.

بو مسابقه ده ننگرهار ولايتي اهاليسي دن تشقري قوشني تومنلر دن مينگلب تماشاچي اشتراك ايتيشگندي. اولر نه فقط افغان اويينچيلريني ترغيبلشر دي، بلكه تاجيكستان كركت تيمي اعضالري فايده سيگه قرصك چليشردي.

تاجيكستان اويينچيلري مربي سي نينگ ايتيشيچه، اولرنينگ بيرقطار اويينچيلري افغان بوليب، كيله جكده افغان اويينچيلريدن كركت ني اورگه نيشده اميد بيلديردي.

عين حالده، افغانستان كركت بورد اداره سي تاجيكستان ملي كركت تيميگه بعضي تخنيكي ياردملر ييتكزيب بيريشيني وعده قيلدي.

ايتيليشيچه، افغانستان نينگ الف كركت اويينچيلري تاجيكستان بيلن باشقه ايكي كون ايچيده عليحده اويين اوتكزه دي.