مزارشريفده شمالي وشمالشرقي 9 ولايت خوفسيزليگي محاكمه ايتيلدي

عینی مناسبت اوتکزیلگن یغیندهجمهوررييسليك وولايت كينگش سيلاولرخوفسيزليگي محاكمه ایتیلدی سيلاولرخوفسيزليگيني تامينلش مسووليتي، باشقه مسووليتلركبي حاضر افغانستان خوفسيزليك كوچلري ذمه سيگه قوييلگن.

افغانستان شماليده گي 209 شاهين قول اوردو قومامداني جنرال زلمي ويسا، شمالي وشمالشرق 9 ولايت ده جمهور رييسليك و ولايت كينگش سيلاولري اوتكزيليشي اوچون جدي خوفسيزليك چاره تدبير كوريب چيقيلگني ني ايتدي. او بو اظهارات ني بوگون مزارشريفده افغانستان شمالي و شمالشرقي 9 ولايت والي لري، سيلاولر مستقل كميسيوني رييسي و خوفسيزليك كوچلر ملازملري اشتراكيده بوليب اوتگن ييغينده تيلگه آلدي.

بو ييغينده، افغانستان سيلاولر مستقل كميسيوني رييسي، ايچكي ايشلروزيرليگي خوفسيزليك معاوني، شمالي وشمالشرقي 9 ولايت نماينده لري، ملي اردومنصبدارلري وآيساف قوماندانلري اشتراك ايتيشدي.

ييغينده، 9 ولايت ده جمهور رييسليك و ولايت كينگش سيلاولري خوفسيزليگي تامينلنيشي باره سيده ياپيق ايشیک آرتيده بحث آليب باريلدي.

اما اولر بحث توگه مسدن مطبوعاتگه گپيرمسليگي ني تاكيدلشدي، ليكن شاهين قول اردوسي قومانداني زلمي ويسا قيسقه مدت ده، مطبوعاتگه شمالي و شمالشرقي 9 ولايت ده جمهور رييسليك سيلاولري اوتكزيليشي اوچون ييترلي جهازلر و برچه امكانيتلر يره تيب بيريلگني ني معلوم قيلدي:" بيز اوزيميزگه قره شلي 114 تومن نينگ سيلاو جرياني ده گي خوفسيزليگي ني تامينله يميز. اولرگه سيلاولر اوچون كيره كلي اسباب وجهازلرني ييتكزيب قويديك، حاضر بيز اوز مسووليميزده گي زون ده هيچ قنده ي خوفسيزليك معما لربارليگي ني سيزمه يميز".

زلمي ويسا شونينگ ديك، شمالده گي خوفسيزليك كوچلري سيلاولر جريانيده يوز بيره ديگن احتمالي ناخوش حادثه لر و بوزمه كارليك لر ني آلديني آليشده قادر ايكني ني تاكيدله دي.

او عين حالده، شمالي ولايتلرنينگ خوفسيزليك مسووليتلري خارجي كوچلردن افغان كوچلريگه تاپشيريش جرياني تكميل بولگندن كيين، مخالفلرنينگ قوراللي هجوملري ميزاني كمه ي گن دييدي:"خارجي كوچلرفعاليت قيله ديگن منطقه لرده هر كوني مخالفلر هجوم اويوشتيرردي، ماين اورنه تيشردي، پيسترمه آليب هجوم قيليشردي، بو مسووليت افغان كوچلريگه تاپشيريلگندن كيين، همه ساحه تينچ بولدي، حاضر هر كيم بير جايدن باشقه جايگه آزاد سفر قيله آله دي".

شاهين قول اردو قومانداني، بوگونگي ييغيندن اساسي مقصد هم، سيلاولر مستقل كميسيوني مسووللري و شمالي ولايتلر اهاليسيگه سيلاو خوفسيزليگي بوتونلي تامينلنيشي باره سيده ايشانچ بيلديريشدن عبارت ايكني ني تاكيدله ماقده.

بو ييغينده شمالي و شمالشرقي 9 ولايت حاكملري و امنيه قوماندانلري نينگ اشتراك ايتيشلري كوتيلردي، اما كورينيشيچه، ايكي ـ اوچ ولايت حاكمي دن بولك باشقه ولايتلر حاكملري قتنش مه گندي.

حمل آيي نينگ 16 ده بوليب اوتيشي كوتيله ياتگن جمهور رييسليك وولايت كينگش سيلاولري خوفسيزليگي ني تامينلش، بو مملكت خوفسيزليك كوچلري نينگ مسووليتي، اما شونگه قره مسدن، اهالي دن بيرقطاري خوفسيزليك بوتونلي روشده تامينلنمسليگي و شفاف بوليب اوتمسليگي دن تشويشده.