حامدكرزي بگرام قماقخانه سيده گي 88 محبوس نينگ آزاد ايتيليشيني كيچيتيردي

افغانستان جمهور رييسي بگرام قماقخانه سيده گي 88 محبوس قوييب يوباريلمسليگي دستوريني صادر ايتگن. امريكا دولتي چهار شنبه كوني بو مسله آرتيدن افغانستان دولتي دن بگرام ده گي 88 محبوس ني آزاد ايتمسليگي ني سوره گن.

بگرام قماقخانه سي ده گي محبوسلرنينگ دوسيه لريني تيكشيرووچي هيات، اوتگن هفته 650 محبوس نينگ تيرورچيليك فعاليتلري اوچون ييترلي حجت قولده موجود بولمه گني باعث، آزاد ايتيليشيگه قرار قيلدي.

بگرام قماقخانه سي محبوسلري دوسيه لريني تيكشرووچي هيات اعضاسي عبدالشكور دادرس نينگ ايتيشيچه، مذكور محبوسلرنينگ دوسيه لر اوستيده كوپراق تحقيقات اوتكزيليشي اوچون، اولرني قوييب يوباريش جرياني كيچيكتيريلگن.

اوتگن آيساف سوزچيلريدن بيري ديو لپن نينگ كابلده ايتيشيچه، بگرام محبوسلري دوسيه لريني تيكشروو اوچون تعيين لنگن هيات، اوز صلاحيتلريدن يوقاري عمل قيليب، خوفسيزليك ني تهديد قيله ديگن محبوسلرني قوييب يوباريش دستوري ني صادر ايتگن.

دادرس، بو تنقيد گه عكس العمل بيلديريب، اولر محبوسلرنينگ گناهكارليگيني معيار قيليب اولرني قوييب يوبارگني ني ايتگن.

اوتگن كون امريكا سنا مجلسي اوچ اعضاسي افغانستان گه كيليب، بو محبوسلرنينگ قوييب يوباريليشي باره سيده آگاه لنتيرگن.

بو سناتورلردن بيري لينزي گراهام نينگ كابلده ايتيشيچه، افغانستان بگرام قماقخانه سيده گي 88 ته محبوس ني محكمه ايتمسدن قوييب يوبارگن تقديرده، امريكا و افغانستان ارا مناسبتلر تصويرقيليب بولمه يديگن درجه ده يامانلنيشي ممكن.

گراهام گه كوره، مذكور 88 ته محبوس 60 ايتلاف عسكري و 57 افغان حربيسيني اولديرگن.

بگرام قماقخانه سي مسووليتي افغانستان گه تاپشيريش مسله سي اوتگن ايكي ييل ايچيده ايكله مملكت مناسبتلريني تره نگلنيشيگه سبب بولگندي.

امريكا بوندن بيش آي آلدين بو قماقخانه مسوليتي ني افغانستان دولتيگه تاپشيردي.

اوندن كيين 3 مينگ و 85 مينگ محبوس نينگ مسووليتي افغانستان دولتيگه بيريلدي. افغانستان دولتي، هيچ بير مملكت افغانستانده قماقخانه ايجاد ايتيشگه حقلي ايمس دييدي.