غزني ده كانكور اشتراكچيلري امتحان هياتلريني تنقيد قيليشگن

غزنیده کانکور سیناویده اشتراک ایتگنلردن کوپچیلیگی سیناو یخشی شکلده بولیب اوتمه گنیدن جدی شکایت قیلیشگن. وقت آزلیگی، قرانغوده سيناو یولگه قوییلگنی، نظارتچیلر يانده شووي يخشي بولمه گنی قتنه شووچیلرنینگ اساسی تنقیدلریدن بولگن.

غزنی ولایتی ایریم وکیللری هم سيناو معیار لرگه ماس بولیب اوتمه گنینی ایتگن، بیراق افغانستان عالی اوقوو وزیرلیگی بوکبی ادعالرنی رد ایتگن.

زبیر ناملی شخص غزنیده اوتکزیلگن کانکور سیناويده قیتنشگن یاشلردن بیری:"کانکور سیناوی ایرته لب ساعت سککیز ده آلینیشی قرار قیلندی، لیکن کانکور سیناوی توشدن سونگ، محلی وقت بیلن ساعت اوچ یریمده باشلندی. عین حالده یریم ساعت اوتیب اوتمس برق یوق لیگی باعث هوا قرانغو بولیب قالدی. بیز سواللرنی یخشی حل قیله آلمه دیک."

قتنه شووچیلردن باشقه بیرته سي محمد نبی هم عینی شکایت بیلن چیقیب، بیرساعت ایچیده امتحان وقتی يكونلنگنيدن ناله يدي،شو حالده او، بیرنفر کارتی ایککی کیشیگه بیریلگنینی هم تیلگه آلیب، بوکبی حالت لرنی معیارلرگه ماس بولمه گنینی اورغوله دی.

حال بوکی کانکور سیناویده اشتراک ایتگنلر اوچون عالي تحصیل وزیرلیگی تمانیدن ایککی یریم ساعت وقت بیریلیشی قيد ايتيلگن.

غزنی ولایتی نینگ پارلمانده گی ملت وکیللریدن خانم شاه گل رضایي، قتنه شووچیلر شکایت لرینی معقوللب، کانکور سیناوی خصوصیده یوزه گه چیققن معما کوریب چیقیلیشینی سوره ماقده:"اون بیر اون ایککی حجره ده یللیک آلتمیش نفر بولسه معما بیلن یوزمه یوزبولگن شخصلر سانی سککیز یوز ویامینگ کیشی بولیشی ممکن. حقیقتن اولر سواللرنی یخشی حل قیله المه گن، بیرتماندن هوا قرانغو بولیب قالگن باشقه تمانیدن ایترلی وقت بیریلمه گن ،شوندی قینچلیک بیلن یوزمه یوز بولگن لر اوچون ینه بیر چانس بیریلشینی طلب قیله میز".

باشقه تماندن پشتو تیلیده سوللر آزلیگی باعث، اون ایککینچی صنف نی بیتیرگنلردن 180 نفری نینگ امتحانی بوکونگه کیچیکتیریلگن، بومسله هم قطار تنقید لرگه سبب بولگن.

افغانستان عالی اوقوو وزیرلیگی سوزچیسی عبدالعظیم نور بخش شونده ی شکایت لر اساسی سیز ایکنینی ایتدی:"عالی تحصیل وزیرلیگی هیاتی حضوریده کانکور سیناوی شفاف بیر شلکده بولیب اوتدی، هیچ قندی معما یوزبیرگن، شکایت لر بیلن چیققن شخصلر انیق معلومات بیرمه گن لرینه هم ایته من غزنیده کانکور شفاف و عادلانه شکلده بولیب اوتگن".

بوندن بیرنیچه کون آلدین کابل بیلن قوشنی بولگن لوگر ولایتیده اوتکزیلگن کانکور سیناوي کتته جنجاللرگه سبب بولیب، امتحان اوچون کابلدن بارگن هیات محلی زوره وان کیشیلرنی کانکور جریانیگه اره لشگنلیکده عیبلب چیقدی. شو باعث اوشبو ولایتده اوتکزیلگن کانکور سیناوی بیکار قیلیندی.

اوتگن ییلرده هم افغانستان نینگ قطار ولایت لریده کانکور سیناوی شفاف بیر شکلده بولیب اوتمه گنی خصوصیده شکایت لر یوزه گه چیققن ایدی.