قوراللي مخالفلر جوزجان نفت قودوقلريدن بيريگه هجوم قيليشگن

هجوم محلی وقت بیلن كيچه ساعت 10 يريم اطرافيده عملگه آشيريلگن.بو حادثه ده نفت قودوغي قوريقچيلريدن بير كيشي اوليب، باشقه ايكيته سي يره لنگن، همده هجومچیلردن بیری هم هلاک بولگن.

جوزجان امينه قومانداني فقيرمحمد جوزجاني نينگ بي بي سيگه ايتيشيچه، حادثه شبرغان شهريدن 15 كيلومتر اوزاقده جايلشگن شكرك نمر2 قودوغيده يوز بيرگن.

شكرك نمبر2 قودوغي افغان گاز تصديسي گه قره شلي بوليب، بير نيچه وقت آلدين قيته تعميرلنگن.

اونگه كوره، ايكله تمان اورته سيده يوزبيرگن آتشيمه ده بير قوراللي مخالف هم نابود بولگن.

جوزجاني جنابلري، قوراللي مخالفلر خوفسيزليك مركزلريگه هجوم اويوشتيريشگه قادر بولمه ي، عاموي فايده لنيش خذمتلريگه ضربه اوريشگه حركت قيله ياتگني ني ايتدي.

بوندن بير آي مقدم قوراللي مخالفلر شبرغان نفت گاز اداره سيگه هجوم قيليب، نتيجه ده بو اداره نينگ بير قوريقچيسي هلاك بولگندي.

شو مسله آرتيدن شبرغان شهريده خوفسيزليك چاره تدبيرلري كوچه يتيريليب، حجت سيز موترسايكللرگه شهرگه كيريشگه رخصت بيرمسليگي قرار قيليندي.

اما شونگه قره مسدن، هلي هم شبرغان نينگ چيككه حدودلري خوفسيزليگي يخشي بولمه گني، اهالي نينگ تشويشيگه سبب بولگن.