افغانستان عالي اوقوو وزيرليگي كانكورده گي قلابليكني آلديني آليشده عاجز قالماقده

Image copyright
Image caption افغانستانده بير نيچه ييلدن بويان كانكور امتحاني قلابليك وجنجللرگه سبب بولگن.

افغانستان بيليم يورتلر بيرلشمه سي اعضالري كانكور امتحانلري جريانيده روي بيره ديگن قلابليكلر آلدي آلينمه گن تقديرده يامان عاقبتلر كيليب چيقيشي حقيده آگاه لنتيريشگن.

اولر بو بوحقده گي تشويشلريني جمهور رييس وعالي اوقوو وزيريگه هم ييتكزيشگن، اما مشكل حلي اوچون هيچ قنده ي اعتبار قره تيلمه گنيني ايتيشگن.

افغانستانده بير نيچه ييلدن بويان كانكور امتحاني قلابليك وجنجللرگه سبب بولگن. شو مسله يوزه سيدن بير نيچه بار اعتراض نمايشلر يولگه قوييلگن.

اوتگن ييللر كبي بو ييل هم كانكور سيناويده كينگ قلابليك يوز بيره ياتگني باره سيده خبرلر نشر ايتيلماقده. عالي اوقوو بيرليگي اعضالري بيرقطار ولايتلرده كانكور امتحانلري جريانيده يوز بيره ياتگن ناقانوني اره لشوو وقلابليكلر، بو جريان نينگ شفافليگي سلبي تاثير اوتكزگني باره سيده تشويش بيلديرماقده لر.

بيليم يورتلر اعضالريدن بيري پوهاند قيس نينگ ايتيشيچه، كانكور امتحانلري كيچه ديگن منطقه لرده كانكور سيناولريگه تينگ بولمه گن خيلمه خيل سيناو اوتكزيله ياتگني، معما توغديرگن:" سيز بير اداره گه بارسنگيز، قوماندان نينگ ايسته گي باشقه ، وكيل نينگ ايسته گي باشقه، ولايت و تومن حاكملري هم عينآ شونده ي. سيز بولرني قنده ي قيليب، بيرلشتيره آله سيز، بو امكان سيز. بو معماني حكومت نينگ وزيرلر كينگشي، پارلمان و تيگيشلي اداره لرگه ييتكزيش كيره ك".

قيس جنابلري، شونينگ ديك، ولايتلرده گي بيرقطار رسميلر، اولوسي جرگه ولايت كينگش نماينده لريني كانكور امتحانلري جريانيگه اره لشه ياتگنليكده عيبله ماقده دييدي. اونگه كوره، بو معما آلدي آلينمه گن حالده، تاباره كوچه ييشي ممكن:"نه فقط كانكور سيناولري، بلكه ديپارتمنتلر وصنفلرده اوتكزيله ديگن امتحانلرده هم عينآ كانكور كبي قلابليك يوز بيره دي. كانكور ده زوردن كامياب بولگن شخصلر، اوقيش ني زوره وانليك بيلن بيتيره دي. بيز بومسله ني عالي وزيري گه هم ييتكزديك جمهور رييس دن بوحقده همكارليك طلب قيلديك، چونكه كانكور ده عمومي اره لشوو يوز بيرماقده".

افغانستان بيليم يورتلر استاذلري بيرليگي كانكور جريانيده يوز بيره ياتگني اره لشوو وقلابليكلرده محلي نماينده لرو رسميلرني عيبله شركن، اما جوزجان بيليم يورتي استاذلريدن بصيرمقيم، اكثر حاللرده بو قلابليكلرده مركزدن هييت صفتيده كيله ديگن شخصلر سببچي بوليشه دي. اونگه كوره، مذكور هييتلر امتحان جريانيده ولايت استاذلري گه نظارت صلاحيتي ني بيرمه ي، اوزلري همه طرفدن حاكم ايكنليگي ني كورستيشه دي. بو مسله ولايتلر استاذلري و محلي اربابلرنينگ قرشيليگيگه سبب بوليب، محل طلبه لريگه ياردم بيريش جرياني و اره لشوو باشلنه دي دييدي.

اوشونينگ ديك، بيرقطار سيلاو نامزدلري هم كانكور ني اوزلري اوچون يگانه كمپاين ترغيبات جرياني ديب، طلبه لرگه ياردم بيريشگه حركت قيليشه دي.

افغانستان عالي اوقوو وزيرليگي اون ييللردن بيري كانكور سيناوي شفاف بوليب اوتيشي اوچون هيچ قنده ي موفقيتليككه ايريشه آلمه دي.

سونگي ده لوگر، بدخشان ووميدان وردك ولايتلريده عملگه آشيريلگن كانكور امتحاني، قلابليك يوزبيرگني سبب، كته جنجلگه سبب بولدي.