کابلده جایلشگن لبنانلیک هوتل گه عصیانچیلرنینگ گروهی هجومی

Image copyright AP

کابل شهری نینگ وزیر اکبر خان مینطقه سیده جایلشگن لبنانلیک هوتل گه اویوشتیریلگن گروهی هجومده خلق ارا پول صندوقی نینگ یوقاری مرتبه لی مقاملریدن بیری وبیرلشگن ملت لر تشکیلاتی نینگ 4 خادمی هم هلاک بولگنی انیق لندی.

کابل پلیس اداره سی نینگ سوزچیسی حشمت الله ستانکزی نینگ بی بی سی گه ایتیشچه ، اوشبو هجومده 13 چیت ایللیک سککیز افغان هلاک بولگنی حاضرگه قدر انیق لنگن، همده ستانکزی جنابلری هلاک بولگن لردن بیش ته سی عیال بولگنینی معلوم قیلدی.

شونینگ دیک کابل پلیس سوزچیسی گه کوره، کانادالیک، روسلیک، و لبنانلیک لر قربان لر اره سیده موجودبولگن وباشقه بیر بیریتانیالیک هم هلا بولگنی ایتیلماقده.

کابل پلیس سوزچیسی حشمت الله ستانکزی قربان بولگن لر حاضرگه قدرهم تولیق انیق لنمه گنینی ایتیب، اما بیرلشگن ملتلر تشکیلاتی نینگ خادملری هم قربان لر جمله سیده ایکنینی معلوم قیلدی.

یره لنگن لر باره سیده انیق رقم یوق، کابل پلیس اداره سی ایکی نفر یره لنگنینی تصدیق له گن ، اما کابل پلیس سوزچیسی یره لنگن لر رقمی کوپ بولیشی ممکن لیگینی ایتگن.ایریم خبر واسطه لری هوتل مدیری داخل تورت کیشی یره لنگنینی معلوم قیلگن.

اوتگن کیچه محلی وقت بیلن ساعت یتتی یریم اطرافیده قورال بیلن جهازلنگن اوچ انتحارچی وزیر اکبرخان منطقه سیده جایلشگن لبنانلیک "تاورنا دو لبان" ناملی هوتل گه هجوم قیلگن ایدی.

مقاملرگه کوره، انتحارچیلردن بیری هوتل مقابلیده اوزینی پارتله تگن وباشقه ایکی انتحارچی پلیس عسکرلری تمانیدن آتیب اولدیریلگن.

بیرلشگن ملت لر تشکیلاتی نینگ باش کاتبی بانکی مون اوشبو هجومنی قتیق قاره لگن.

اوزینی طالبان سوزچیسی دیب ته نشتیرگن ذبیح الله مجاهد هجوم طالبان تمانیدن اویوشتیریلگنینی ایتگن.

هجوم یوزبیرگن محل یقینیده نروژ، کانادا و تاجیکستان ایلچی خانه لری جایلشگن. کوزه توچیلر هجومنی اوته کوچلی بولگنینی ایتیب یان اطرافده گی بنالرهم خساره کورگنینی تیلگه آلگن.