جنرال دوستم نینگ قزاقستان و اوزبیکستان گه سفری آرتیده نیمه یاته دی؟

Image copyright Junbish.net

جنرال عبدالرشید دوستم نینگ اوزبیکستان و قزاقستانگه سفر قیلگنی حقیده خبرلر چیققن. دوستم جنابلریگه تیگیشلی دیب کورینه دیگن فیسبوک اجتماعی ترماغیده گی صحیفه ده جنرال نینگ قزاستان پایتختی آستانه ده توشگن رسملری 28 جنوری کونی پیدا بولدی.

اوشبو رسملرده عبدالرشید دوستم نینگ قزاق ملازملری بیلن اوچره شووی و شهرنی ایله نیب اعتبارگه مالک جایلرده توشگن رسملری عکس ایتگن.

قزاقستانده استقامت قیلاوچی افغانستان موضوع سیده بیر نیچه کتاب موءلفی، سیاست شناس الکسندر کنیزه وی نینگ ایتیشیچه، عبدالرشید دوستم آستانه گه تاشکینت آرقه لی کیلگن و آستانه دن سونگ آلمه آته گه کیلیب مهم اوچره شوولر اوتکزگن.

سیاست شناس اوز منبعلری آرقه لی اوشبو خبرنی تصدیقله گنینی ایته دی. کنیزوه جنابلری جنرال دوستم نینگ اپریل ده بولیب اوته دیگن جمهور رییسلیک سیلاولری آلدیدن منطقه گه سفر قیلیشیگه اعتبار قره ته دی.

"دوستم سیلاولر وضعیت نی بوتکول حل قیلمسلیگینی و برقرارلیکنی کوتیش کیره ک مسلیگینی یخشی توشونه دی. جنرال وضعیت 90 انچی ییللریده گی کبی کورینیش آلیشینی تخمین قیله یاتگن بولیشی ممکن. شونده افغانستان ایتنیک و سیاسی جهتدن بیر نیچه انقلابلرگه بولینگن ایدی" ، ـ دییدی الکسندر کنیزیوه.

کنیزوف جنابلری اوزبیک جنرالی اوزبیکستانده خوفسیزلیک مسله لریگه جوابگر مسووللر بیلن اوچره شگنینی تخمین قیله دی. سیاست شناس قزاقستان ده قنده ی مسله لرکوته ریلگنی حقیده کوپراق معلوماتگه ایگه ایکنلیگینی بیلدیردی.

"دوستم قزاقستانده محلی خوفسیزلیک کمیته سی رییسی نورته ی ابیکووف و اوشبو موسسه نینگ جنوبی قزاقستان بوییچه مسووللری بیلن اوچره شدی. اوندن تشقری قزاقستان ده تاثیرگه ایگه افغان دییسپاره سی وکیللری بیلن هم کوریشگن. اوشبو سفرنینگ مقصدی حربی جهتدن خوفسیزلیک نی تامینلشگه قولاو آلیش ایمس، بلکه افغانستان نینگ قیسی دیر قسمینی قولگه کیریتسه یانیلغی بیلن تامینلش مسله لریده دستککه امید قیلیش دیر"، ـ دییدی الکسندر کنیزیوف.

قزاقستان افغانستانگه یانیلغی مایلش محصولاتلرینی ییتکزیب بیریشده ییتکچیلیک قیله دی. متخصصلرنینگ تاکیدلشیچه، دوستم جنابلری کیله جکده اوشبو مسله ده معما گه دوچ کیلمسلیگینی انیقلشتیریش اوچون هم قزاقستانگه سفر قیلگن.

اوشبو اوچره شوودن یقیندن خبردار بولگن الکسندر کنیزوف عبدالرشید دوستم قزاق رسمیلری دن قانیقتیرووچی وعده لر آلگنینی ایته دی.

سابق اتفاق دولتلری افغانستان نینگ شمالیده مقیم جایلشگن جنرال عبدالرشید دوستم نی ضمدن و آشکاره قوللب کیلیشگنی ایتیله دی.

اینیقسه اوشبو منطقه بیلن بیواسطه چیگره داش بولگن اوزبیکستان اوچون دوستم طالبان دن حمایه قیلووچی مهم کوچ صفتیده قره ب کیلینگن.

جنرال دوستم نینگ تشریفی قزاقستان و اوزبیکستان مطبوعاتیده آشکار قیلینمه گن. قزاقستان تشقی ایشلر وزیرلیگی اوشبو حادثه گه ایضاح بیرمه دی.

سیاست شناس الکسندر کنیزیوف قزاقستان یاده اوزبیکستان نینگ اوزبیک جنرالی نی آچیق قوللشی افغانستان حکومتی ده سیاسی خطا بولیشی ممکنلیگینی ایته دی.

"ضعیف بولسه هم و بوتون افغانستان منطقه سیده تاثیرگه ایگه بولمسه هم افغانستان نینگ رسمی حکومتی بار. باشقه دولت، خصوصآ اوزبیکستان و قزاقستان اوشبو دولتده گی بیرار سیاسی حزب رهبرلرینی قوللشینی بیلدیره آلمه یدی".