جوزجان ده هوا ساووق لیگی نتیجه سیده 12 کیشی قربان بولگنی ایتیلماقده

جوزجان ولایتی نینگ قوش تپه و درزاب اولسواللیک لریده هوا ساووق لیگی نتیجه سیده کمیده 12 کیشی قربان بولگن، اوشبو ولایت محل مقاملریگه کوره، تیز یاردم یتیب کیلمه گن تقدیرده، تلفات سانی کوپیشی ممکن.

جوزجان ولایتی نینگ درزاب حاکمی محمد رحیمی، نیچه کوندن بیری آغیر یاغینگرچیلیک لر سبب بو تومن یوللری یاپیلیب قالگنینی ایتگن، اونگه کوره، هوا ساووق لیگی باعث کمیده 10 کیشی قربان بولگن.

شونینگ دیک حاکم جنابلری 550 چاروا مال هم ساووق طفیلی تلف بولگنینی معلوم قیلگن.

درزاب تومن حاکمی محمد رحیمی تیز یاردم یتیکزیلیشینی طلب قیلیب بوحقده شوندی دیگن:" خلق ارا تشکیلات لر بیزلرگه یاردم قیلسین، یوللریمیز نی آچیش اوچون همکارلیک قیلسین لر، انسان لر و چارواماللرنی قوتقزیشگه اورینسین لر، یوللر ناتینچ و مینطقه ده قوراللی طالب لر موجود و قینچیلیک لریمیز اوته کوپ."

آنه شو حالده قوش تپه تومن حاکمی، هوا ساووق لیگی سبب ایککی کیچیک باله هلاک بولگن لیگی نی معلوم قیلگن.اوتگن کون هم جوزجان ولایتی نینگ ایریم مینطقه لریده سوو تاشقینی عاقبتیده اونلب چاروا هلاک ایتیلیب اهالی مالی خساره کورگنی تصدیق لنگن ایدی.