افغانستان بویلب قاردن اولگنلر سانی آشماقده

سرپل ولایتی نینگ ولایت حاکمی عبدالجبار حقبین گه کوره، اوشبو ولایت نینگ کوهستانات تومنیده مسافر ته شووچی موتر موزگه سیلغینیب آغدریلگن نتیجه ده 11 کیشی قربان بولگن، هلمند ولایتیده ایسه هوا ساووق لیگی نتیجه سیده 7 کیشی قربان بولگنی ایتیلماقده.

سرپل رسمیلریگه کوره، کوهستانات تومنیدن سرپل مرکزی قره ب کیله یاتگن مسافر ته شووچی موتر علف سبز و قلعه سوخته منطقه سیده یولدن چیقیب آغدریلگن. نتیجه ده بیرعیال وتورت باله داخل 11 کیشی قربان بولیب باشقه بیرکیشی هم یره لنگن.

محلی مقاملرگه کوره، سونگی وقتلرده اوشبو ولایت نینگ ایرم اولسواللیک لرینی مرکز بیلن باغلاوچی یوللری بوتونلی موزلهب قالگن، انه شو باعث ترافیکی حادثه لر هم آنده سانده یوز بیریب توره دی.

عینی حالده جنوبی هلمند ولایتی نینگ گرم سیر تومنیده هوا ساووق لیگی طفیلی بیش چوپان هلاک بولگن، همده ایککی کیشی هم تام تیپه سی چوککنی سبب قربان بولگنی ایتیلماقده.

هلمند ولایتی نینگ ولایت حاکمی سوزچیسی عمرزواک بوخبرنی تصدیق لب، هوا ساووق لیگی طفیلی قریب 800 چاروا مال هم تلف بولگنینی معلوم قیلگن.

نیچه کون آلدین جوزجان ولایتیده هم هوا ساووق لیگی نتیجه سیده 14 قربان بولیب و یوزلب چاروا مال تلف بولگنی خبرقیلگن ایدی.

افغانستان طبیعی آفت لرگه قرشی کوره شیش اداره سی نینگ معلوم قیلیشیچه، سونگی هوا ساووق لیگی و ییر سیلجیشی نتیجه سیده افغانستان نینگ تورلی ولایت لریده41 کیشی قربان بولگن

هرییلی افغانستانده سیل، ییر سیلکنیش ، قار کوچکی سی کبی طبیعی آفت لر یوزبیریب جانی ومالی تلفات قالدیره دی.

رسمی رقم لرگه کوره، میلادی 2012 – ییلده 383 طبیعی حادثه افغانستان نینگ 195 تومنیده روی بیریب 478 کیشی دن جان آلگن.

باشقه تماندن شمالی سرپل ولایتیده نفوذلی شخص لردن بیری ترور ایتیلگنی خبرقیلینماقده، سرپل حاکمی عبدالجبار حقبین حاج یاسین ناملی شخص محلی پلیس کوچلری بیلن یقین همکارلیکده بولگنینی اورغولب شوباعث طالبان تمانیدن ترور ایتیلگندیب فکر بیلدیرگن.اما حاضرگه قدر طالبان عصیانچیلری بوخصوصده هیچ نرسه ایتمه گن.