حميرا محزون قاضیزاده: تانیدینگ می ایندی اوزنی؟بولمه سه آچگیل کوزینگ

مولوي عبيدالله سرپلي قيزي حميرا محزون قاضي زاده 1343 ييل، حمل آييده سرپل ده گي بير ضالي عايله ده دنياگه كيلدي.

او ياشليك دوريني اوز يورتيده اوتكزدي. كيينچه ليك آته سي هرات، كاپيسا، لوگر، جوزجان ولايتلريده قاضي صفتيده تعيين ايتيلگني سبب، عايله سي بيلن مذكور ولايتلرده وقتينچه ليك كون كيچيريب، شو دور جريانيده آته سي يانيده ايلك تعليم درسلريني اورگه نيشگه باشلب، 1351 ييلده كاپيسا محمود راقي ليسه سيده رسمي روشده درسگه كيردي. حميرا محزون كيين عايله سي بيلن اورته مكتبلري درسلريني هرات و لوگر ولايتلريده دوام ايتديريب، آته سي نفقه گه چيققن دن سونگ، توقيزينچي صنفگچه جوزجان وسرپل مكتبلريده درس اوقيدي.

اونهايت مكتب ني جوزجان نينگ خديجه ليسه سيده بيتريب، او مكتبده اوقيتووچي صفتيده تدريس قيله باشله دي.

حميرا محزون قاضيزاده باله ليك دوريده آنه يورتي سرپل گوزه ل منظره لري دن الهاملنيب، شاعر بوليش اوچون شعر يازيشگه اونده دي. او 1372 ييلدن بويان ايكي تيل فارس و اوزبيك تيليده"جوزجانان"، "نواي كهسار" يولدوز" و بيدار ناملي گزيته لر بيلن قلمي همكارليك كورستيب كيلگن.

محزون خانم ني شعر يازيشده شمالده گي زبردست شاعرلر جمله دن استاد محمد امين متين اندخوي، سراج الدين قانع ومحمد اسماعيل مشفيق سانجي لر تشويشله گن.

او شاعرليك فعاليتلريدن تشقري، 1381 ييلدن بيري ملي و خصوصي تيلويزيونلرده جوزجان ده پروديوسر صفتيده وظيفه بجريب كيلماقده.

محزون خانم، جوزجان حمايوي مركزيده مدير صفتيده ايشلب، بونينگ يانيده امير علي شيرنوايي تعليم موسسه سيده حقوق بوييچه تحصيل قيلماقده.

او عايله دار بوليب، اوچ قيز و ايكي اوغيل نينگ آنه سي.

او ايلك "دريچه ي اميد" ناملي شعري توپلميني چاپدن چيقردي.

اوزلیگیمنی تانیدیم

بیرله شینگ لراولکه ده کیم خلقیمیزخواراولمه سین

قیغووغم نی کوروب کونگلی افگاراولمه سین

نفت وگاز ولعل وآلتون معدنی دیرتوتوپراغی

یاولریمیزبیزلره ایگه وباداراولمه سین

بیرله شینگ تاخلقیمیزبیکاروبیماراولمه سین

ابسکی شهرم اول دیارم آنه یورتیم مسکنم

ترکستان آتلیک خراسان جان وجانان هم تنم

باش کوتاردیم ایته گینگ ده اوزلیگیم نی تانیدم

ایندی جانم نی فداایله ی سینگاای مامنم

فخرایترمن یولینگده جانم فداایلاگنیم

هیچ قچان اول دشمن مکاردین سین قورقمه گیل

کوزینی قان اوشله گن خونباردن سین قورقمه گیل

قل بولوب ملکینگ ساتیب باشینگ ینه ایلنمه سین

کج کلالیک ظالم وباداردین سین قورقمه گیل

اول کورش میدانیده پیکاردین سین قورقمه گیل

تاریخنگ یپراقینی فخرینگ بیلن یازگن اوزینگ

بیلمه سه هرکیمسه قدرینگ کورقیلگی دیرتوزینگ

نورجهان و بابر و تیمور وگوهرشاد اویی

تانیدینگ می ایندی اوزنی؟بولمه سه آچگیل کوزینگ

هرگزایرمس کم بهااوزبیک تیلیم سینی سوزینگ

بواولکه نالیشین سالگیل قولاق سین بول زمان ایندی

بونالش بیرله بیلدیرگی اوزین دردین بیان ایندی

فریب چی وخیانت گرسینی آلدینگده جایلشگن

بویورتینگ ایچیده آلگیل تنیب یخشی یمان ایندی

سنی باتورلیگینگ بولگن جهان اوزره عیان ایندی

ایاافغانستان ملکم مینگا شوکت وشانم سن

ادیب پرورسخاوت لیک هرات باستانم سن

زمرد تاغ وتاشلیک ای تخارو هم بدخشانم

بغرینگ ده نفت وگازآلگن سرپل جوزجانم سن

مثال یولدوزهم کهکشان لیک آسمانیم سن

وطن وصفینگ نی انچه ایله سم دیر آز

که سندین بهره آلگن دیر ادیب وشاعرو شهناز

کوزینگده نورقولینگده کیم توان باریچه یاز(محزون)

وطن آتی ده چین کونگل بیلن باشله سوزوساز

دعاایتسین وطن سیورلرایتیب سینگا ای شهباز