اوباما كرزيني امريكاليك كوچلر نينگ افغانستان ني بوتونلي ترك ايتيشي باره سيده آگاه لنتيرگن

Image copyright AP

اوباما امريكا مدافعه وزيرليگي گه ميلادي 2014 ييل اداغيگچه افغانستان دن اوز حربيلريني آليب چيقيش و حربي ماموريتيگه پايان بيريش لايحه لري اوچون زمينه يره تيشي باره سيده دستور صادر قيلگن.

امريكا جمهور رييسي باراك اوباما افغانستان جمهور رييسي حامدكرزي ني امريكا دولتي 2014 ييل اداغيگچه اوز حربيلريني افغانستان دن آليب چيقيشي ممكن ليگي باره سيده آگاه لنتيرگن.

اوباما جنابلري بو اظهارات ني سه شنبه كوني امريكا بيلن خوفسيزليك پيمان امضالنيشي دن واز كيچكن افغان همكسبي حامدكرزي بيلن اوتكزگن تیلفون علاقه ده بيان ايتگن.

اوباما حاضر مدافعه وزيرليگي دن حربي كوچلرنينگ چيقيشي زمينه سيني يره تيشي ني سوره گن. بو برنامه گه اساسا، ميلادي 2014 ييلدن سونگ، هيچ بير امريكاليك عسكر افغانستان قالمسليگي ممكن.

آق اوي نينگ ايتيشيچه، امريكا دولتي افغانستان بيلن خوفسيزليك پيمان امضالشگه رغبت كورستيب، ميلادي 2014 ييلدن سونگ افغان حربيلريني تيارگرليك دن اوتكزيش و القاعده گه باغليق گروه لرني قيديريش اوچون بيرتعداد حربيلريني بو مملكتده قالديريشيگه طرفدار.

سونگي هفته لر ايچيده، امريكا رسميلري خوفسيزليك كيليشوونامه ني افغانستان نينگ كيله سي جمهور رييسي بيلن امضاله شيني نظرده توته ياتگني احتمالي حقيده خبرلر ترقلماقده.

عين حالده، آق تمانيدن ترقلگن مكتوبده خوفسيزليك بيتيم نينگ امضالنيشي قنچه كه كيچيكتيريلسه، امريكا ليك كوچلرنينگ افغانستان ني ترك ايتيش احتمالي كوچه ييشي ممكنليگي تاكيدلنگن.

آق اويگه كوره، اوباما ايكکی مملكت ارا ايكي تمانلمه همكارليكلرني حمايه ايتيب، قوراللی مخالفلربيلن صلح جرياني و شفاف سيلاو بوليب اوتيشي ني حمايه قيليشيني ايتگن.

اوتگن ييل نينگ آخرلريده افغانستان و امريكا ارا خوفسيزليك بيتيم امضالنيشي مسله سي باره سيده كابلده لويه جرگه اوتكزيليب، اونده جرگه اعضالري بيتيم ني تصديقلب، جمهوررييس كرزي دن تيزليك بيلن امضالشيني سوره دي.

اما حامدكرزي بونگه اوز شرطلريني ايلگري سوريب، شرطلر انابتگه آلينمه گن تقديرده امضاله مسليگيگه محكم بودي.