ولايت كينگش سيلاو نامزدلري اجتماعي ترماغلرده كمپاينلريني باشلشب يوباريشگن

Image copyright bbc
Image caption افغانستان ده ولايت كينگش سيلاو آلدي كمپاينلري كيله سي سه شنبه يعني 4 مارچده رسمآ باشله نيشي قيد ايتيلگن.

افغانستان ده ولايت كينگش سيلاو آلدي كمپاينلري كيله سي سه شنبه يعني 4 مارچده رسمآ باشله نيشي قيد ايتيلگن، اما نامزدلردن بيرقطار حاضردن باشلب، اجتماعي ترماغلرده كمپاين قيله باشلشگن. اولر فوتوصورتلري و سيلاو برنامه لريني اعلان قيليشگن. شونگه قره مسدن نامزدلردن بيرتعدادي بو كمپاينلرني قانون بوزرليك ديه تاكيدلشگن.

بو مسله مزارشريف، قندوز وخوست ولايتلريده كوزه تيله ياتگني ايتيله دي.

فيسبوك ايكله نامزد يعني جمهور رييسليك وولايت كينگش نامزدلري اوچون يگانه سيلاو ترغيبات كمپاين مركزلريگه ايلنگن. نامزدلر و اولرنينگ طرفدارلري رسملر و لايحه لرني نشر ايته باشله گنلر.

بونده ي كمپاينلر مزارشريف، قندوز، خوست و باشقه منطقه لرده گي نامزدلرتمانيدن ايلگري سوريلماقده.

اوزيني ملي جنبش حزبي دن بلخ ولايتي ولايت كينگش سيلاولريده نامزد قيلگن زيب نسا خيري، فسبوك ده كمپاين باشله گن نامزدلردن بيري. او بوندن بير نيچه كون آلدين فيسبوكده باشله گن و طرفدار تاپگن.

خانم خيري گه كوره، فيسبوك كمپاين اوچون يگانه فايده لي منبع.

ولايت كينگش نامزدلريدن بيرقطاري، كمپاينلريني باشلرايكن، اما اولردن بيرتعدادي، افغانستان سيلاولر مستقل كميسيوني تعيين ايتگن تاريخ گه حرمت قايل ايكنليكلريني تاكيدله ماقده لر. حاضرگچه هيچ بير حركت قيلگنيم يوق، كمپاينيميزني كيله سي سه شنبه دن باشله يميز، دييدي بلخ ولايتي ده گي نامزدلردن باشقه بيرته سي محمد زمان.

او سيلاولر مستقل كميسيوني نينگ بويروغي و سيلاو قانوني ني بوزمه ي، هنوزگچه هيچ بير ييغين و كمپاين ني يولگه قويمه گن.

بو نامزد قانون گه مطابق سيلاو آلدي كمپاينلريني باشلرايكن، اما بيرقطار ياشلر اجتماعي ترماغلر آرقه لي تنله گن نامزدلري فايده سيگه ترغيبات و تشويقات ايشلر ني ايلگري سورماقده لر. اولر باشقه لرني انيق نامزد فايده سيگه آواز بيريشگه چقيرماقده لر.

محمد نصير اورال هر دايم فسبوك ده شغللنيب تورگن ياشلردن بيري. او فسبوكده ولايت كينگش نامزدلري حقيده كيته ياتگن كمپاينلر و اولرگه نسبتآ چيقه ياتگن فكر وملاحظه و جنجللر كوپ اوچره گن.

بو كمپاينلر فقط شمالي ولايتلر ايمس، بلكه شمالشرق و جنوب شرق ولايتلريده هم باشلني خبر قيلينماقده. قندوز و خوست ولايتي دن آلينگن خبرلرگه كوره، نامزدلر اجتماعي ترماغردن تشقري ييغينلر اويويشتيريب، ولايت قيشلاغلريگه سفر قيليب، اهالي بيلن اوچره شوو ني باشلشگن.

اهالي آوازيني كسب ايتيش، برنامه لايحه لريني نشر ايتيش، نامزدلرنينگ اساسي حقلريدن سنله دي، اما تعيين ايتيلگن وقت دن آلدين كمپاين باشلش، سيلاو قانونيگه قرشي حسابلنه دي.

اما هنوزگچه افغانستان سيلاولر مستقل كميسيوني ولايت كينگش نامزلري تمانيدن ايرته باشلنگن سيلاو آلدي كمپاينلري توغريسيده بيرار بير عكس العمل بيلديرمه گن.

بو كميسيون ولايت كينگش نامزدلريگه اوز كمپاينلريني ايلگري سوريشگه بير اوتيز كون وقت اجره تگن. بو سيلاو جمهور رييسليك سيلاولري بيلن بيرگه 16 حمل ده بوليب اوته دي.