بلخ ده اشرف غني احمدزي كمپايني تهدید لر بیلن دوچ کیله یاتگنی ایتیلماقده

انجنير عبدالغني اوتگن كون بلخ ولايتي كودبرق تومنيده تانگي پيت سپورت قيله ياتگن بير چاغده ناتنيش قوراللي شخصلر تمانيدن آتيب اولديريلگن.همده اشرف غنی احمدزی نینگ فاریابده گی کمپاین مسوولی گه قرشی پلان لشتیریلگن انتحاری هجوم آلدی آلینگن.

انجنییر عبدالغنی نینگ اولدیریلگنینی جمهور رييسليككه نامزد اشرف غني احمدزي نينگ بلخ ولايتيده گي كمپاين ترغيبات مركزي باشليغي سيد شمس الدين سادات يوزلب نفر اشتراكيده اوتكزيلگن كمپاينده مطبوعاتگه آشكار ايتدي.

اونگه كوره، انجنير عبدالغني ملي جنبش اعضاسي بوليب، اشرف غني احمدزي نينگ ترغيبات كمپاينلريني كود برق منطقه سيده آليب باره ياتگن شخصلردن بيري ايكن.

سادات، اونينگ اولديريلگني گه هيچ بير شخص يا گروه ني عيبله مه دي، اما كمپاينلر باشلنگني دن بيري اعضالري نامعلوم شخصلر تمانيدن تيلفون آرقه لي تهديدلنه ياتگني ني ايتدي.

سيدشمس الدين سادات شونينگ، بلخ ولايتي پوليسيني اشرف غني احمدزي نينگ رسملري خوفسيزليگيني تامينله مه ياتگنليكده عيبله دي. اونگه كوره، خوفسيزليك پوسته لر يقينيده جايلشگن اشرف غني احمدزي نينگ كته رسم و بيلبوردلري بير كون اوتمه ي، ايرتيليب تشلنه دي.

او مزارشريفده يگانه اشرف غني احمدزي نينگ كمپايني تهديدگه دوچ كيله ياتگني دن تشويش بيلديردي.

اشرف غني نينگ مزارشريف ده گي كمپاين اداره سي مسوولي شونينگ ديك، مزارشريف شهردارليگي ني شهرايچيده انيق بير نامزد گه رسميلريني قيستيريشگه رخصت بيرگنليكده عيبليب، معلوم بير نامزد اوز رسملريني دولت بنالري و منع ايتيلگن جايلر گه قيستيرگنيدن شكايت قيلدي.

سادات جنابلري بلخ ولايتيده كمپاينلري تهديدگه اوچره ياتگني دن شكايت قيلرايكن، بوگونگي كمپاينده اشرف غني احمدزي نينگ يوزلب طرفدارلري اوني حمايه ايتيشيني اعلان قيليب، مزارشريف ده اكثريت آوازني قولگه كيريتيشلريدن بشارت بيريشدي.

باشقه تماندن جمهوررییسلیک سیلاو نامزدلریدن اشرف غنی احمدزی نینگ فاریابده گی کمپاین مسوولی و فاریاب ولایت کینگشی رییسی رحمت الله ترکستانی گه قرشی پلانلشتیریلگن هجوم آلدی الیندی.رحمت الله ترکستانی میمنه شهریدن خواجه سبزپوش منطقه سیگه قره ب باره یاتکن زمانی موتر سایکلگه مینیلگن شخص ترکستانی قوریقچی لر آرقلی اوقه توتیب اولدیریلگن. رحمت الله ترکستانی بی بی سی بیلن بولگن صحبتیده مذکور واقعه نی تایید لب، اوکیشی میمنه دن خواجه سبزپوش تومنیگه اشرف غنی احمدزی نینگ کمپاینینی یولگه قویش اوچون باره یاتکن زمانی بوحادثه اورته گه چیقن لیگینی معلوم قیلدی.

ترکستانی بوحادثه ده فقط خودکش هجومچی هلاک بولگن لیگینی ایتیب باشقه هیچ کیمگه ضرر یتمه گن دیدی

همده او، بوحادثه ده طالباننی عیبله دی. طالبان گروهی بوحقده هلی گچه هیچ نرسه دیمه گنلر. فاریاب محلی رسمیلری بوحقده معلومات بیریش دن باش تارتماقده لر.