افغانستانده كميده 134 مينگ عيال كوكره ك سرطانيگه چلينگني ايتيله دي

Image copyright SPL

افغانستان ده كوكره ك و بچه دان سرطان كسلليگي، عياللر اوليميگه سبب بوله ياتگن كته عامل ايكني ايتيلماقده.

افغانستان داكترلري، بو كسلليك آنه لرنينگ توغيشي اوليمي دن سونگ، ايكينچي عامل حسابلنه ياتگني ني ايتيشگن.

سرطان كسلليگي ني انيقلش امكاني افغانستانده موجود.اما مينگلب عيال بو كسلليكدن اذيت چيكيب، دوالنيش اوچون خارج گه سفر قيليشه دي.

افغانستان آنه لرنينگ اوليمي ميزاني آشگن مملكت لردن بيري سنله دي. بولردن اكثريتي تولد قيليش چاغلريده اوليم گه دوچ كيليشه دي.

بو عامل دن كيين، كوكره ك و بچه دان سرطاني، افغان عيالري اوچون اوليم ميزاني ني تشكيل بيره دي.

اما كوكره ك سرطاني باشقه مملكتلرگه قره گنده، افغانستان ده آزراق اوچره يدي، دييدي عياللر كسلليگي بوييچه متخصص داكتر معروف سامعي:”افغانستان ده سيديه سرطاني باشقه جايلرگه كوره، كم روي بيره دي، چونكه ايميزيديريش اوزي كوكره ك سرطاني حاللريني كمه يتيره دي. باشقه تماندن ايرته تورموشگه چيقيش، كوكره ك سرطانيگه چلينيش ني آزيتيره دي”.

اما افغانستان ساغليق ني سقلش وزيرليگي مملكتده بچه دان و كوكره ك سرطانيگه چلينگن ساني حقيده انيق حسابات موجود ايمس ليگي ني تاكيدله ماقده.

اما متخصصلرگه كوره، كمبغلل مملكتلرده گي عياللردن اوچ دن بيرقسمي كوكره ك سرطانيگه چيلينگنلر.

افغانستان مركزي احصايه اداره سي نينگ سونگي حساباتيگه گه بنآ؛ مملكت ده 13 ميليون دن آرتيق عيال حيات كيچيره دي.

شو. حسابات اساسيده، افغانستانده كميده 134 مينگ عيال كوكره ك سرطانيگه چيلينگنليگي تخمين قيلينه دي.

شونينگ ديك تحقيقاتلرده كورستيليشيچه، آسياده بير ميليون اوچ يوز مينگ عيال بچه دان سرطانيگه چلينگن و بو كسلليككه چيلينگنلرميزاني، قشاق مملكتلرده كوپراق اوچره يدي.

اما آيا بو سرطانلرنينگ افغانستانده دوالنيشي ممكن مي؟

كوكره ك سرطاني ني دوالش افغانستانده آزگينه ممكن دييدي، ساغليق سقلش وزيرليگي نينگ خصوصي بوليملرني نظارت ايتووچي مسوولي داكتر نجيب نعيمي:”افغانستانده انيقلش امكان موجود، راديو ترافيك دن باشقه. دولت و نادولت شفاخانه لرده انيقلش امكان بار.

داكتر سامع گه كوره، افغانستانده بچه دان سرطاني كسلليگي اساسي شكلده دوالنمه يدي:”ابتدايي باسقيچلرده انيقلنگن حالده، بچه دان ني چيقه ريب، دوالش ممكن. اگر كسلليك كيچيككن بولسه، بچه دان اطرافيده گي لمپاوي لرني هم آليب چيقه ريش كيره ك. اوندن كيين راديو ترافي قيليش لازم، اما افسوس كه حاضر افغانستانده راديو ترافي يوق”.

داكترلر، آغيريق سيز وحركتسيز دومبيق؛ كوكره ك سرطاني و حيض انتظام سيزليگي وبچه دان نينگ كينگه يگني ني بچه دان سرطاني نشانه لريدن ايكني ني ايتيشماقده لر.

بو نشانه لر كورينگن حالده، تيزليك بيلن داكترگه مراجعت ايتيش كيره ك.

كوكره ك سرطاني بوييچه متخصص محمدسليم توانا كوكره ك سرطاني تيزليك بيلن انيقلنگن حالده، دوالنيشي ممكن، دييدي:”آلدينراق انيق لنگن تقديرده دوالنيشي ممكن. بو اوزي يخشي بير چانس. كسلليك باشقه جايلرگه چلينمه ي توريب دوالنسه، يخشي بوليش امكان موجود”.

سرطان انساجلرنينگ منتظم سيزليك اوسيشي سبب وجودگه كيله دي. بو نينگ انيقلش و دوالنيشي، زمانوي اسباب واوسكونه و كته خره جت طلب قيله دي.

افغانستان ساغليق ني سقلش وزيرليگي بو كسلليككه چلينگنلر ساني ني انيقلش اوچون ايش باشلب، بونگه قرشي كوره شيش ني نظرده توتگن.

بو وزيرليك كته مبلغ گه خارجگه سفر قيله ياتگن كسللرنينگ دوالنيشي اوچون خذمتلرني يره تيشگه سعي و حركت قيلماقده.