مزارشريف ده نوروز بيره مي اوچون تيارگرليك كوريلماقده

شمالي مزارشريف ده نوروز بيره مي اوتكزيليشي مناسبتي بيلن قتيق خوفسيزليك چاره تدبير كوريلگن. روضه واونينگ اطراف ساحه لري تازه لنيب، ترافيك بيكيتلري شو مناسبت بيلن بوشه تيلگن.

اطراف منطقه لردن آدملر ينگي ييل و نوروز بيرمي ني نشانلش همده زيارت اوچون مزارشريف شهريگه كيليب جايلشگنلر. بو زيارتچيلر، دولت دن بيرم مراسمي خوفسيزليگي تامينلنيشي سوره ماقده لر.

اما آلدينگي ييللرگه قره گنده، بو ييل شهر ده گي هوتل و مهمانلر تيقينچ كورينمه ي ياتگني ايتيله دي.

شونگه قره مسدن، بو شهر اهاليسي ينگي ييل ني كوتيب آليش اوچون بازارگه چيقيب، عايله اعضالريگه ينگي كييم و مهمانلري اوچون آذيق آوقت ساتيب آليشگن.

روضه ايچكريسي و تشقريسي تعميرلنيب، ينگي گلدانلر اورنه تيلگن. پوليس اونينگ اطرافي ني قمره ب آلگن.

اما بو نوروز آلدينگي ييللرده گي بيرملرگه قره گنده، دبدبه لي كورينمه ي ياتگني ايتيله دي. چونكه كيريب كيلگن جمهور رييسليك و ولايت كينگش سيلاولري بي شبهه تاثير قوييگني سيزيله دي.

مزارشريف ده نوروز بيرمي نشانلنيشي حمل آيي نينگ بيرينچي كوندن باشلنيب، قيرق كونگچه دوام ايتديريله دي. عايله لر سومه لك و شونگه اوخشه گن نذر آوقتلرني تيارلشه دي.

نوروز ني نشانلش عنعنه سي افغانستانده اوزاق دوردن بيري دوام ايتديريلماقده.

اما مزارشريف ده همه مهمي حضرت علي نينگ زيارتگاهي دير. مزارشريف انه شو زيارتگاه سبب، اكثر آدملرني اوزيگه تارته دي.

ينگي ييل يا نوروز بيرمي مراسميده سياسي و ديني عالملر سوزگه چيقيب، جنده توغي كوتريشه دي. جنده توغي ني كوته ريش نوروزني نشانلش مقصديني افاده لب، ينگي ييل باشلنگني دن دلالت بيره دي.