جلال آباد ده یوزبیرگن گروهی هجوم ده 18 کیشی هلاک بولدی

Image copyright AFP

افغانستان ایچکی ایشلر وزیرلیگی اورین باسری جنرال ایوب سالنگی نینگ ایتیشیچه، جلال آباد شهریده اویوشتیریلگن گروهی هجوم نتیجه سیده 10 پلیس، یتتی انتحارچی و بیر تینچ فقرا هلاک بولگن.

افغانستان ایچکی ایشلر وزیرلیگی بوندن آلدین آلتی انتحارچی ننگرهار ولایت نینگ جلال آباد شهریده گی پلیس قرارگاهی گه هجوم قیلگنینی ایتگن ایدی.ولایت بناسی هجوم گه توتیلگن مرکز یقنیده جایلشگن.

ایچکی ایشلر وزیرلیگی سوزچیسی صدیق صدیقی بوگون ایرته لب فیسبوک و تویتیر صحیفه سیده هجومچیلردن بیش ته سی هلاک ایتیلیب باشقه ایککی انتحارچی محلده قالگن بولیشی ممکن لیگی حقیده خبربیرگن ایدی.

شونینگ دیک او، عملیات دوام ایتیب کیله یاتگنینی ایتیب ایککی پلیس عسکری هلاک وباشقه بیرنیچه پلیس یره لنگنینی تصدیق له گن.

بی بی سی نینگ محلده گی خبرنگاری نینگ ایتیشیچه ملی تلویزیون آرشیفی هجوم نتیجه سیده یانگن.

ننگرهار ولایتی نینگ مرکزی کسلخانه مسوللری بی بی سی بیلن بولگن صحبتیده یره لنگن 20 کیشی کسلخانه گه آلیب کیلینگن لیگینی ایتگن.

شاهد لرگه کوره، محلی وقت بیلن ساعت بیش اطرافیده پارتلاوچی ماده جایلشتیریلگن موتر پلیس مرکزی مقابلیده پارتله تیلیب کینچه لیک هجومچیلرپلیس مرکزی بناسیگه باستیریب کیریشگه حرکت قیلگن.

حاضرگه قدرهم هجومچیلر و پلیس کوچلری اره سیده توقنه شوولر دوام ایتیب کیله یاتگنی ایتیله دی.

طالبان سوزچیسی بیر خبرنامه ترقه تیب هجوم مسوولیتی نی اوز ذمه سیگه آلگن. خبرنامه ده یازیلیشیچه، پارتلاوچی ماده جایلشتیریلگن مزدا رسوملی موتر، امنیتی حوزه مقابلیده پارتله تیلیب کیین هجومچیلر بنا ایشکریسی گه باستیریب کیرگن. همده طالبان گروهی هجومچیلر تمانیدن ولایت بناسی وایریم دولتی بنالرهجوم آستیگه آلینگنینی ادعا قیلگن.