افغانستان ملي خوفسيزليگي: سريناگه قيلينگن هجوم پاكستان استخبارات تمانيدن ايدي

Image copyright AP

بو هجوم ده 9 كيشي تينچ اهالي اولدي اولردن تورته سي خارجي فقرا ايدي.

افغانستان ملي خوفسيزليك اداره سي باشلنغيچ تحقيقاتلرده هجوم پاكستان استخباراتي تمانيدن عملگه آشيريلگنيني ايتگن.

ملي خوفسيزليك اداره سي سوزچيسي لطف الله مشعل نينگ ايتيشيچه، قولگه كيريتيلگن حجتلرده بو هجوم پاكستان استخباراتي تمانيدن پلانلشتيريلگني ني كورستيلگن.

او بو ادعانينگ اثباطي اوچون انيق تفصيلات بيرمه گن.

مشعل گه كوره، سرينا هوتلي نينگ اكثر خادملري پاكستانليك بوليب، هر كيچه بو هوتلده كميده قيرق نفر پاكستانليك خادم وظيفه بجررايكن، اما اولر حادثه كيچه سي هوتل ده موجود بولمه گن.

اونينگ ايتيشيچه، هوتل خادملريدن بيري ملي خوفسيزليككه پاكستانليك خادملردن بيري او مملكت استخباراتي بيلن علاقه ده ايكنيني ايتيب، حادثه دن بير هفته آلدين وظيفه سيني ترك ايتيب پاكستان گه كيتگنيني معلوم قيلگن.

مشعل جنابلري بوندن آلدين هم پاكستان ليك ديپلماتلردن بيري سپورت تيملريگه اعضاليك قيليش مقصديده سريناگه كيليب، هوتل نينگ ايريم بوليملريدن عكس آلگن.

اونگه كوره، 1392 ييلده طالبان اون ايكي بار سرينا هوتليگه هجوم قيليشگه حركت قيلگن اما ملي خوفسيزليك اداره سي اولرنينگ هجوملريني بيكار قيلگن.

هجومچيلر كيچيك قوراللريني كاووشلريده ياشيريب هوتل گه كيريشگن.