سرپل ده ولايت كينگش نامزدلريدن بيري اون نفري بيلن اوغيرلندي

Image copyright

ولايت كينگشي گه نامزد محمد حسين نظري اوزي نينگ اون نفر يولداشلري بيلن سوزمه قلعه تومني گه كمپاين قيليش مقصديده باريب، اوتگن كون كيچقرون سرپل گه قيتيب كيله ياتگن بيرچاغده قوراللي مخالفلر تمانيدن اوغيرلنگن.

سرپل امنيت آمري سخيداد حيدري نينگ بي بي سيگه ايتيشيچه، مذكور نامزد طالبان تمانيدن شيرامان منطقه سيگه آليب كيتيلگن. او اولرني آزاد ايتيش اوچون محل آقسقاللري همكارليگيده مذاكره باشلنگن.

اونگه كوره، سوزمه قلعه تومني ولايت نينگ نا تينچ منطقه سي بوليب، طالبان اوييرده فعاليت قيليشه دي.

اوتگن كون سيلاولرخوفسيزليگي ني تامينلش اوچون بو ولايتده تازه لش حربي عمليات يولگه قوييلگندي. بو عمليات ده طالبان فعاليت قيله ياتگن صياد تومني اولرنينگ تصرفيدن تازه لنگن

سرپل خوفسيزليك مسووللري بو عملياتده 6 پوليس اوليب يره لنگنيني هم تصديقله گن.

صياد تومني جوزجان و سرپل ولايتلري آره سيده گي قتناو يول آقيمي ده جايلشگن. هر دايم طالبان عصيانچيلري شو يولده يولاوچيلرنينگ يوليني توسيشه دي.

عين حالده، فارياب دن آلينگن خبرلرگه كوره، طالبان قيصار تومني دن ميمنه گه كيله ياتگن كمپاين آدملريگه هجوم قيليب، اولردن اوچته سيني اولديرگن.

فارياب خوفسيزليك مسووللري نينگ ايتيشيچه، بو حادثه المار و قيصار تومنلري اهاليسي ميمنه ده برپا ايتيلگن اشرف غني احمدزي نينگ كمپاينيده اشتراك ايتيش اوچون كيله ياتگن بير چاغده يوز بيرگن.

شونينگ ديك، اندخوي و دولت آباد اورته سيده هم طالبان ميمنه گه كيله ياتگن كمپاينچيلرگه قره ته اوق اوزيب، اولردن اوچته سيني يره لنتيرگن.

اشرف غني احمدزي بوگون ميمنه، شبرغان و بلخ ولايتلريده كمپاين اوتكزدي.

سيلاو كمپاينلري يكونله نيب، آواز بيريش پيتلري يقينلشرايكن، طالبان عصيانچيلري سيلاولرخوفسيزليگي ني برهم اوريش مقصديده، هجوملريني شدتلنتيرگنلر.

اما شونگه قره مسدن اهالي سيلاولرده قتنه شيشلريني تاكيدله ماقده لر.