سیلاوکمیسونی: نامزدلر بوتون آواز نتیجه لری نی کوتیب توریش لری کیره ک

افغانستان سیلاولر مستقل کمیسیونی جمهور رییسلیک نامزدلریدن شاشیلمه ی، کته قسم آواز نتیجه لرینی کوتیب توریشلرینی سوره گن.

بو کمیسیون مسووللری، نتیجه لرنینگ کوپ قسمی اعلان ایتیلیشی بیلن آوازلر میزانی اوزگریشی ممکنلیگی نی ایتیشگن.

عین سیلاولر کمیسیونی، 94 فایزدن آرتیق نتیجه قاغازلری کمیسیون گه ییتیب، سیستم گه کیریتیله یاتگنلیگی دن خبر بیرگن.

جمهور رییسلیک نامزدلری دن بیرتعدادی اوتگن کون اعلان ایتیلگن نتیجه لرگه عکس العمل بیلدیرگنی آرتیدن، سیلاولر مستقل کمیسیونی بو نامزدلرنی شاشیلمسلیک و چیده ب توریشگه چقیردی.

بو کمیسیون سوزچیسی نورمحمد نورنینگ بی بی سی گه ایتیشیچه، بو نامزدلرنتیجه لرنینگ کته قسمی اعلان ایتیلیشینی کوتیب توریشلری کیره ک:"نامزدلرنینگ صبر قیلیشلری کیره ک. بیز بیلگیلنگن وقتده باشلنغیچ نتیجه لرنی اعلان قیله میز. کیم اکثریت آوازنی قولگه کیریتگنگی معلوم قیلینه دی. شو لحاظ دن نامزدلر و اهالی نی شاشیلمسلیککه چقیره میز".

آلدینده تورگن عبدالله عبدالله و اشرف غنی احمدزی اعلان ایتیلگن سیلاو نتیجه لرینی خوش قرشیله گنلر، اما قالگن آلتی نامزد نتیجه لردن راضیلیک بیلدیریشمه گن.

شو مسله سبب، زلمی رسول، عبدالرب رسول سیاف؛ داوود سلطانزوی، قطب الدین هلال، هدایت امین ارسلا، و گل آغا شیرزی لر بیر قوشمه اعلامیه نشر ایتیشگن.

بو اعلامیه ده سیلاولر مستقل کمیسیونی نتیجه لر اعلان ایتیلمسدن آلدین قلبکی آوازلرنی اصلی رای لردن اجره تیب، عملگه آشیریلگن قلابلیکلر و شکایتلرنی تیکشیرگندن سونگ، اعلان قیلیشی کیره کلیگی ایتیلگن.

بو نامزدلر، سیلاو کمیسیونی نی سیلاو نتیجه لری قلبکی آوازلرنی اجره تمه ی اعلان ایتگنی و کیلیب چیقه دیگن عاقبتلرگه مسوول دیه آگاه لنتیرگنلر.

سیلاولر مستقل کمیسیونی، قلبکی آوازلر و شکایتلر تیکشیریلیب، هیچ کیم گه اره لشیشگه رخصت بیریلمسلیگی نی تاکیدله ماقده.

بو کمیسیون سوزچیسی، 94 فایزدن آرتیق آواز قاغذلری کمیسیون گه ییتیب، کیلگن و سیستمگه کیریتیلماقده دئیدی:"فقط 5 بوتون اوندن 6 فایز اواز نتیجه لری قالگن. بولر هم شو هفته ده ییتیب کیله دی. اوتگن کون بیز 26 ولایت نینگ محللریدن اون فایز آوازلرینی اعلان قیلدیک خلاص".

حاضرگه قدر 26 ولایت نینگ 10 فایز آوازلری اعلان ایتیلگن و قالگن قسمی نتیجه لر باشقه بیر نیچه کونگچه اعلان ایتیلیشی ممکن.

افغانستان جمهور رییسلیک و ولایت کینگش سیلاولری بوندن بیر هفته آلدین یعنی 16 حملده تینچ و برقرار بیر منظره ده اوتکزیلدی. اهالی بو سیلاوده مثلی کوریلمه گن درجه ده اشتراک ایتیب، خواهله گن نامزدلریگه آواز بیریشدی.

اما اهالی حاضر نهایی نتیجه لر و کیم جمهور رییس بولیشی نی کوتیب توریشگن.