ارگوگه قیلینگن یاردملر جریانیده انتظامسیزلیک کورینه دی

Image copyright Reuters

افغانستان طبیعی آفت لرگه قرشی کوره ش اداره سی شامل بیرقطار خلق ارا یاردم تشکیلاتلری انسان پرورلیک یاردملرینی ییتکزیب بیرماقده لر.

بو اداره رییسی محمددایم کاکر، هنوزگچه تاجیکستان، پاکستان و بیرقطار خلق ارا تشکیلاتلرتمانیدن آذیق آوقت، داری درمان، چادیر و ایسیق کییم کیچکلر جبردیده لرگه ییتکزیب بیریلگنینی ایتیب، آذربایجان، قزاقستان، اوروپا، امریکا، هند، چین، عربستان و ایتالیا دولتلری هم یاردم ییتکزیب بیریشلری باره سیده وعده قیلیشگن.

اما محل گه سفر قیلگن بی بی سی مخبری بشیرپیمان نینگ ایتیشیچه، یاردم لرنی ترقه تیش جریانی انتظام سیز بولیب، جبردیده لر محلی زوره وانلرنینگ یانده شوولری و ایچیملیک سوو آزلیگی دن شکایت قیلیشگن.

مخبرگه کوره، یاردملرنینگ کته قسمی محلی ده گی زوره وانلر واولرنینگ یقینلریگه ترقه تیلگن و محتاج عایله لرگه ییترلی درجه ده یاردم ییتکزیلمه گن.

بدخشان نینگ اولوسی جرگه ده گی نماینده سی فوزیه کوفی جبردیده لرگه بیرمقدار یاردم ییتکزیب بیریلگنی نی تصدیقله گن، اما اولرنی ترقه تیش جریانی انتظامسیزلیگی نی تنقید قیلگن.

بی بی سی مخبری نینگ ایتیشیچه، کوچکی یوزبیرگن محلده ینه بیر تاغ نینگ کوچیش احتمالی موجود بولیب، پسده گی قیشلاقلرنی ینه هم خطر تهدید قیله دی.

اونگه کوره، ییرکوچکی سی یوللرنی کیسیب قویگن و یامغیر سوولری ییغیلیب، اطراف ده گی قیشلاقلرنی تهدیدگه سالگن.

حاضر برلاس، شمر، هزاره آب باریک و چارگل قیشلاقلرینی ییر کوچیش تهدید قیلماقده.

ثورآی نینگ 12 سیده بدخشان نینگ آب باریک قیشلاغیده روی بیرگن کوچکی ده 300 تورر جای لای و توپراق ته گیده کومیلدی. اما تلفات میزانی باره سیده هنوزهم معلومات موجود ایمس.

اما جمهور رییسلیک سیلاولری نینگ آلدین ده تورگن نامزدلری منطقه گه سفر قیلگن.

اولردن بیری اشرف غنی احمدزی. او اوتگن کون ارگو تومنیگه ییتیب باریب، قربانلرنی قیدیریش عملیاتی دولت تمانیدن توخته تیلگنی تنقید قیلیب چیققن. اشرف غنی گه کوره، اوزگریش ودوام تیمی بیرینچی بولیب، محل گه اوز یاردملرینی ییتکزیب بیرگن.

اما عبدالله عبدالله نینگ سیلاو تیمی اونینگ بوگون ارگو گه سفر قیلیشیدن خبر بیرگن. او دولت دن جبردیده لر اوچون خلق ارا همجمعیت مملکتلریدن ییترلی یاردم سوره شینی طلب قیلگن.