مزارشریفده آذیق ـ آوقت نرخی کوته ریلدی

Image copyright bbc

كابل ني شمالي ولايتلر بيلن باغله يديگن تاشقرغان بوغيزي نينگ بير هفته دن بيري كيسيليب قالگني، مزارشريف ده آذيق آوقت نرخي قيمتلشيب، تاجرلرنينگ كتته مبلغ ضررلنگنليگي گه سبب بولگن.

خريدارلر ايسه، ساتيب آليشگه قوربي ييتمه ياتگنيدن شكايت قيليشگن.

مزارشريف نينگ افغانستان تجارت و صنعت مركزي ايكنيگه قره مه ي، اكثر توارلر ايران وپاكستان مملكتلريدن وارد قيلينه دي.

مزارشريفده تاجرلر يول ياپيقليگي باعث، بو ييردن باشقه ولايتلرگه توارلريني صادر قيله آلمس ايكنلر، امابولردن بيرقطاري پاكستان و ايران مملكتلريدن وارد قيله ديگن توارلريني يول آقيميده ارزان نرخده ساتيشگه هم مجبوربوليشگن.

تاجرلرگه کوره، اولر بوندن آلدین هر کونی اون مینگدن زیاد دالرگه سودا ساتیرایکن، اما بوگونگی کونده حتی بیرمینگ دالرگه هم ساتیشگه قادر ایمسلر. اولرنینگ ایتیشیچه، شو مسله دن کته مبلغ ضرر کوریشگن.

مسله فقطگينه گوريچ، اوون، چاي وشكرده ايمس، بلكه پياز وكچالو نرخي كيسكين قيملشگن. بوندن مقدم 250 افغانی گه ساتیله دیگن بیر سیر کچالو ایسه، حاضر اوچ یوز افغانیگه ساتیلماقده. بای بدولت آدملرنینگ قوربی ییتسه، اما کمبغل آدملر حتی بیر کیلو هم آلیشگه قادر ایمسلر.

ایتیب اوتیش جایزکه، بو معما یگانه مزارشریفده ایمس، بلکه جوزجان، سرپل وفاریاب ولایتلریده هم آذیق ـ آوقت و ضروری ماده لر نرخی کوته ریلگن و آدملرنینگ حیاتیگه سلبی تاثیر اوتکزگن.

بو تاجرلرتوارلرنرخي آشگنيگه يول نينگ ياپيلگنيني سبب قيليب كورسترايكن، اما باشقه بيرتعدادي سيلاولردن بيري بازار وضعيتي يخشي ايمس ديیشه دی. اولر سیلاولرنینگ ایککینچی دورگه قالدیریلگنی باره سیده هم تشویش قیلیشماقده. یعنی بو دورهم اوتکزیلگونچه، بازار وضعیتی یامانلنیب، ایش زمینه لری یوقالیشی ممکن.

تاشقران بوغیزی نینگ یاپیلگنی و یوک تشووچی ماشینلرنینگ بوغیزنینگ ایککی تمانیده قاله یاتگنی، بیرقطار تاجرلرنینگ ماده لرینی اوشه محلده ارزان نرخده ساتیشلریگه هم سبب بولگن. بو تاجرلرگه کوره، اولر مذکور توارلرنی ایران وپاکستان مملکتلریدن وارد قیلیشگن.اما مزارشریف گه ییتکزیشگه قادر بولمه ی، نقصیگه ساتیشگه راضی بولیشگن.

مزارشريف ده تاجرلر تاشقرغان بوغيزي بير هفته دن بيري ياپيلگني سبب، ضرر كوررايكن، اما افغانستان فوايد عامه وزيرليگي بوندن اوچ كون مقدم يول ني شو هفته ايچيده ترافيك يوزيگه قيته آچيشيني وعده قيلگندي، اما معلوماتلرگه كوره، یول هنوزگچه ترافیک یوزیگه آچیلمه گن، اما پیاده آدملرنینگ اوتیب ـ توریشلری اوچون زمینه یره تیلگن.