یمگان تومنی طالبان نظارتی گه اوتگنی ایتیلماقده

بدخشان ولایتی نینگ محلی مقاملری یمگان تومنی طالبان نظارتی گه اوتگنیدن خبر بیره دی، اما ایچکی ایشلروزیرلیگی سوزچیسی صدیق صدیقی مذکور تومن گه طالبان قوراللی لری هجوم قیلگنینی تاکیدلب، تومن نینگ طالبان تمانیدن باسیب آلینگنینی تصدیقلمه یدی.

یمگان تومنی بدخشان مرکزی فیض آباد شهریدن قریب سکسن کیلومتر اوزاق لیکده جایلشگن، قوراللی طالبان محلی وقت بیلن ساعت اون اطرافیده اوشبو تومن گه هجوم قیلگنیدن سونگ هجومچیلر و افغان امنیتی کوچلری آره سیده توقنه شوولر باشله نیب کیتگن، اوروش یوزبیرگن تومن قوشنی لیگیده جایلشگن جرم اولسواللیگی یشاوچیلریدن بیری یمگان تومنی طالبان تصرفی گه اوتگنینی حکایه قیله دی:"طالبان تیلفون علاقه لرنی کیسیب قویگن، باریب قیته یاتگن مردم یمگان تومنی نینگ بوتونلی طالبان تصرفیگه اوتگنینی ایته دی. پلیس ضابط لریدن بیری طالبان گه تسلیم بولگن، یعنی تومن طالبان تامانیدن باسیب آلینگن برچه جرم یشاوچیلری شوندی دیدی."

بدخشان ولایتی نینگ پلیس اداره سی نینگ امنیت امری سید عبدالقدیر صیاد، پلیس ضابط لریدن بیری طالبان گه قوشیلگنی باره سیده هیچ نرسه ایتمی فقط بیر پلیس ضابطی هلاک بولگنینی تصدیق لب شوندی دیدی:"نیچه لحظه الدین اوروش نینگ دوامی بار ایدی، ملی پلیس، محلی پلیس و امنیت کوچلریدن عبارت بولگن قریب ییگیرمه بیش کیشی طالبان بیلن قتیق اوروشدی. اساسی قینچلیک شو کی بیزنینگ علاقه لری میز یمگان تومنی بیلن کیسیلیب قالدی. قوراللی عصیانچیلر اوشبو تومن نینگ ایریم منطقه لرینی تصرف ایتگن."

شونینگ دیک صیاد جنابلری یمگان تومنیده گی امنیتی کوچلرنینگ جهازلنتیریش و سونگی وضعیت باره سیده مرکز جریانگه قوییلگینینی تیلگه آلدی، مذکور تومن طالبان عصیانچیلریدن تازه لنمه گونگه قدر جرم وکشم کبی تومنلر امنیتی هم طالبان تهدید ی بیلن یوزمه یوزمه بولیشی ممکن.

افغانستان ایچکی ایشلر وزیرلیگی سوزچیسی صدیق صدیقی بی بی سی بیلن بولگن صحبتیده قوراللی طالبان نینگ یمگان اولسواللیگیگه هجوم قیلگنینی تن آلیب لیکن، تومن نینگ طالبان تصرفیگه اوتگنینی تصدیق لمه یدی:"بوگون ساعت اون اطرافیده یمگان ده گی کوچلریمیز قینچلیک لر بیلن یوزمه یوز بولدی. دشمن هجوم قیلدی، لیکن کوچلری میزاولرنینگ هجومیگه قرشی جواب بیردی. ضرورت بولگن حالده قوشیمچه کوچلر جونه تیله دی. اما بو معما یقین آره ده حل بوله دی.

طالبان عصیانچیلری بیر خبرنامه ترقه تیب یمگان تومنی اوز نظارتیگه آلگنینی ایتیب 16 پلیس هلاک بولگنینی ادعا قیلگن، عین حالده بیاناتده اوچ قوراللی طالب هم هلاک بولگنی خبربیریلگن.

بدخشان افغانستان شمال شرقیده جایلشگن ولایت لردن بیری بولیب تاجیکستان ، پاکستان و چین بیلن قوشنی چیگره ایگه سونگی وقت لرده بو ولایت نینگ ایریم تومنلریده ایچکی و تشقی جنگری لر فعال بولگنی جدی تشویش لرنی توغدیرگن.