امريكا عسكري طالبان نینگ بيش محبوسی عوضيگه آزاد قيلينگن

Image copyright AP

امريكا جمهوررييسي نينگ ايتيشيچه، امريكا و طالبان اورته سيده مذاكره چي بولگن قطر حكومتي افغانستان ده طالبان قريب بيش ييل دواميده توتقينليكده اوشلب تورگن امریکاعسکری قوييب يوباريليشي عوضيگه كوانتاناموده سقلنگن بيش محبوس نينگ خوفسيزليك كفاليتيني بيرگن.

بو حقده جمهور رييس اوباما آق اويگه تكليف قيلينگن امريكاليك حربي نينگ آته ـ آنه سي رابرت و جان بيربيرگده لر يانيده گپيرگن.

جمهور رييس اوباما نينگ ايتيشيچه، سيرجنت بيرگدل نينگ آزاد قيلينيشي امريكانينگ " بيرار بير ايركك و بيرار بير عيال ني جنگ ميدانيده تشلب كيتمسليك" وعده سيگه صادقليگي ني نمايش ايته دي.

سيرجنت باي بيرگدل طالبان حبسده اوشلب تورگن يگانه امريكاليك حربي بولگن.

28 ياشلي سيرجنت باي بيرگدل 31 مي كوني پاكستان چيگره سيگه يقين جايده طالبان تمانيدن امريكا حربي لريگه تاپشيريلگن.

سونگي ده كابل يقينيده گي بگرام حربي قرارگاه گه، اوندن كيين آلمانده گي امريكا حربي قرارگاهيگه آليب كيتيلگن.

او 2009 ييل 30 جونده، افغانستان گه يوباريلگني دن ايككي آي اوتيب طالبان تمانيدن اسير آلينگن ايدي.

گوانتاناموده سقلنگن بيش محبوس او ييرده گي توتقينلر آره سيده گي اينگ ياشي كته لري بولگن.

اولر 2001 ييلگچه افغانستان ني نظارت قيلگن طالبان حاكميتيده وزيري، وزير اورين باسري، ولايت حاكملري و قوماندان لوازملريده ايشله گن محبوسلر دير.

افغانستان طالبان ني اوز صفداشلري آزاد ايتيلگنلريدن "كته بختيارليك" حس قيلگنلري حقيده اعلان قيلگن.

گوانتانامو توتقينلري قطر رسميلريگه تاپشيريلگن، اولر قطرني 1 ييل دواميده ترك ايتيشلري تحقيقلنه دي.