ملاعمر، بیش طالب محبوس آزاد ایتیلشینی " کتته یوتوق" دیه بهاله دی

طالبان گروهی رهبری ملا محمد عمر بيرخبرنامه نشر ايتيب، امریکالیک بيرعسکرنينگ قوییب یوباریلیشی عوضیگه بیش طالب محبوس نینگ گوانتاناموی قماقخانه سیدن آزاد ایتیلیشینی "کتته يوتوق " دیه بهاله گن.

بوی برگدال، شنبه کونی امریکا کوچلریگه تاپشیریلدی.

ملاعمر میلادی 2001 – ییل طالبان حکومتی آغده ریلیشی دن سونگ، هيچ بير جايده ظاهر بولمه ي، چيقيش قيلمه گن.

او اوز بیاناتیده:"مین برچه مسلمان افغان خلقیگه صمیمی قوتلوغ پیام یول له ی من."ديگن.

قوییب یوباریلگن امریکالیک عسکرنينگ دواله نیش اوچون آلمان گه جونه تيلگني ايتيله دي.

امريكا كانگريسي، او مملكت دولتيني بو موضوع باره سيده بوندن 30 كون آلدين اولرگه معلومات بيرمه گني باره سيده تنقيد قيلگن، اما امريكا مدافعه وزيري چاك هيگل بو قرارني حمايه ايتگن.

او، امريكا قوشمه ايالتلري اوز عسكرلري نينگ جانيني قوتقه ريش اوچون تيز عمل قيليشي كيره كليگي ني تاكيدله گن. اونگه كوره، بويي برگدال نينگ جاني خطرده بولگن.

ايتيليشيچه، طالبان نينگ قوييب يوباريلگن بيش رسمي سي يوقاري مرتبه لي بوليب، گوانتاناما ده قماقده كون كيچيرر ايكن وامريكاليك كوچلر اولرني 2001 ييلده قولگه آليشگن.

امريكا مدافعه وزيري المشتيريش جرياني افغانستان دولتي نينگ خبرسيزليگيده بوليب، بو جريان امريكا دولتي و طالبان اورته سيده عملگه آشيريلگنيني ايتگن.

بو مملكت تشقي ايشلروزيرليگي بيانات نشر ايتيب، محبوس طالبان لرني اوچينچي مملكتگه تاپشيريش خلق ارا قانونلرگه ضد ايكنيني بيلديرگن.

بياناتده، قطر و امريكا دولتي دن مذكور شخصلرنينگ آزاد ايتيليشي سوره لگن.

مذكور طالبان بيش محبوسي قطردولتي نينگ واسطه چيليگيده آزاد ايتيلگني ايتيله دي.