امريكا ايلچيسي: طالبان هيچ بير محبوسيني افغانستانگه تاپشيريشگه قرارقيلمه گنميز

Image copyright AFP

افغانستان دولتي نينگ طالبان بيش محبوسي آزاد ايتيلگن دن كيين قطرگه تاپشيريلگني آرتيدن، امريكا نينگ افغانستانده گي ايلچيسي جيمزكانينگهام افغانستان دولتي و امريكا بو مسله باره سيده آيلر آلدين كيليشيب آلگني ني ايتگن.

سونگي ده امريكا دولتي اوزي نينگ طالبان قوليده گي محبوس عسكري بويي برگدال نينگ عوضيگه طالبان بيش يوقاري مرتبه لي محبوسيني گوانتانامو ده گي قماقخانه دن آزاد ايتيب، قطرگه تاپشيردي.

كانينگهام جنابلري نينگ اخبارات واسطه لريگه ايتيشيچه، افغانستان دولتي مذكور محبوسلرنينگ آزاد ايتيليشي وقطرگه تاپشيريليشي باره سيده خبردار بوليب، بوحقده آْلدين دن كيليشب آلگنيني معلوم قيلگن.

امريكا ايلچيسي نينگ تاكيدلشيچه، محبوسلرنينگ افغانستان دولتي گه تاپشيريليشي باره سيده امريكا افغانستان اورته سيده هيچ قنده ي شرطنامه امضالنمه گن.

اوتگن افغانستان تشقي ايشلروزيرليگي بير اعلاميه نشر ايتيب، بو مملكت دولتي اوز فقرالري حقوقيني حمايه لشگه مكلف ايكني ني ايتيب، امريكا دولتي مذكور بيش محبوس ني ايركينليكلري چيكلنيشي اوچون قطرگه تاپشيرگن بولسه، بو تدبير خلق ارا قاعده قانونلرگه ضد ديه توصيفله گن.

تشقي ايشلروزيرليگي سوزچيسي احمد شكيب مستغني نينگ بي بي سيگه ايتيشيچه، مملكت جمهور ريسي حامدكرزي اوزي نينگ اينگ سونگي تيلفون علاقه سيده امريكا تشقي ايشلروزيرليگي دن قوييب يوباريلگن محبوسلر افغانستان دولتيگه اوتكزيليشيني طلب قيلگن.

امريكا ايلچيسي گه كوره، مذكور شخصلر قطر بيلن عملگه آشيريلگن كيليشووگه بنآ، بير ييل مدت ايچيده قطرده قاليشي ممكن.

افغانستان تشقي ايشلروزيرليگي امريكا و قطردن ايكله تمان ارا عملگه آشيريلگن كيليشووگه بنآ، مذكور بيش محبوس نينگ ايركينليگي قطرده چيكلنتيريلگن حالده، اولرني قوييب يوباريشي كيره كليگي ني سوره گن.

بو مسله امريكا ايچيده هم بيرقطار عكس العمللرگه روپه ره بولگن. جمهوريتچي سناتور جان مكين، قطرگه اوتكزيلگن محبوسلرني اينگ خطرناك شخصلر ايكني باره سيده آگاه لنتيرگن.